كەلەسى اپتادا استانا قالاسىنىڭ اكىمدىگى مەن «استانا Innovations» اق «Smart Astana 2014» IV كونفەرەنتسياسىن وتكىزەدى. الداعى شارا جايىندا بىزگە اكتسيونەرلىك قوعامنىڭ باسقارما توراعاسىنىڭ ورىنباسارى ءازيزا كوپبوسىنوۆا ايتىپ بەردى.
– كونفەرەنتسيانىڭ ماقسات-مىندەتتەرىنە توقتالساڭىز.
– اتالمىش كونفەرەنتسيانى 2011 جىلدان باستاپ جىل سايىن وتكىزىپ كەلەمىز. ماقساتىمىز – ەلوردا تۇرعىندارى مەن قوناقتارىنا قىزمەت كورسەتۋدىڭ ساپاسىن ارتتىرۋدىڭ وزەكتى تاقىرىپتارىن تالقىلاپ, قالانىڭ عالامدىق باسەكەلەستىككە قابىلەتتىلىگىن كۇشەيتۋ. استانانىڭ الەۋمەتتىك ينفراقۇرىلىمىن دامىتىپ, قالاعا ينۆەستيتسيالاردى دا تارتۋىمىز قاجەت. ول ءۇشىن استانانىڭ ءيميدجى دە جاقسارۋى ءتيىس. مۇنداي كونفەرەنتسيا وعان تولىقتاي مۇمكىندىكتەر اشادى دەپ ويلايمىز. اتاپ وتەيىك, بيىلعى باسقوسۋىمىز «Smart Astana» جوباسىنىڭ جول كارتاسى مەن استانا قالاسىنىڭ الەمنىڭ
50 «اقىلدى» قالالارىنىڭ رەيتينگىنە ەنۋى جونىندەگى ءىس-شارالار جوسپارىنا ورايلاستىرىلعان.
– تالقىعا قانداي تاقىرىپتار سالىنادى؟
– «Smart Astana» – دامۋدىڭ كەلەشەگى مەن بەتالىسى», «قاۋىپسىز استانا», «ەكسپو-2017» – ءتيىمدى يننوۆاتسيالىق ينفراقۇرىلىم» جانە «استانا – جوعارى تەحنولوگيالار قالاسى» اتتى تاقىرىپتار قاۋزالادى.
– وسىنىڭ الدىنداعى كونفەرەنتسيالار مامانداردىڭ كوڭىلىنەن شىقتى ما؟ جالپى, وتكەن كونفەرەنتسيالارعا كىمدەر قاتىستى? وسى جولعى باسقوسۋدا كىمدەردى كورە الامىز؟
– بۇدان بۇرىنعى كونفەرەنتسيالاردا اقىلدى قالالاردىڭ جاڭا تەحنولوگيالارىن دامىتۋدىڭ قىر-سىرىن مەڭگەرگەن جەتەكشى مامانداردان وڭ باعا الدىق. ولار ءبىزدىڭ جوبالارىمىزعا ۇلكەن قىزىعۋشىلىق تانىتتى. اتاپ ايتساق, وۋلۋ, يوكاگاما, چيكاگو سياقتى وسى سالاداعى كوشباسشى قالالاردان كەلگەن ساراپشىلار مەن «ZTE», «CISCO», «IBM», «PricewaterhouseCoopers» جانە ت.ب. سىندى اتاقتى الەمدىك كومپانيالاردىڭ ءبىرىنشى باسشىلارى بولدى. الداعى كونفەرەنتسياعا «Ernst&Young», «PWC» كونسالتينگتىك كومپانيالارى جانە «Samsung» ونەركاسىپتىك كونتسەرنى سەرىكتەس رەتىندە قاتىسادى.
امانعالي شميتۇلى
