1961 جىلى تىڭ ولكەسى قۇرىلعاندا قوستاناي وبلىستىق كومسومول كوميتەتىنىڭ ءبىرىنشى حاتشىسى بولىپ قىزمەت اتقارىپ جۇرگەن باتىل, باستاماشىل, جىگەرلى دە وجەت ماعاۋيا سەيىلقىزى ولكەلىك اتقارۋ كوميتەتى توراعاسىنىڭ ورىنباسارى قىزمەتىنە تاعايىندالادى.
ول مۇندا 1965 جىلى ولكەنى تاراتقانعا دەيىن ءبىلىم بەرۋ, دەنساۋلىق ساقتاۋ, مادەنيەت سالالارىن باسقارادى. سودان سوڭ تسەلينوگراد وبلىسى ەڭبەكشىلەر دەپۋتاتتارى كەڭەسىنىڭ اتقارۋ كوميتەتى توراعاسىنىڭ ورىنباسارى, 1975 جىلدان تسەلينوگراد وبلىستىق پارتيا كوميتەتىنىڭ يدەولوگيا جونىندەگى حاتشىسى قىزمەتىندە بولدى.
ماعاۋيا سەيىلقىزى تسەلينوگراد قالاسىندا 1963 جىلى پەداگوگيكالىق, 1964 جىلى ينجەنەرلىك-قۇرىلىس ينستيتۋتىن اشۋعا ءوز ۇلەسىن قوستى. ال تسەلينوگرادتا مەديتسينا ينستيتۋتىن اشۋ ءۇشىن ماسكەۋگە ءۇش رەت بارادى. كسرو دەنساۋلىق ساقتاۋ ءمينيسترى س.ۆ.كارتاشوۆتىڭ قابىلداۋىندا ەكى رەت بولادى. كارتاشوۆ «تسەلينوگرادتان 200 شاقىرىم جەردە قاراعاندى مەدينستيتۋتى بار» دەپ كەلىسىم بەرمەپتى. ءۇشىنشى ساپارىندا ماعاۋيا سەيىلقىزى سوكپ ورتالىق كوميتەتىنە تىكەلەي ماسەلەنى شەشەتىن بولىمگە بارىپ, ناتيجەسىندە كسرو دەنساۋلىق ساقتاۋ مينيسترلىگىنە قاراستى مەدينستيتۋتتىڭ تسەلينوگرادتا اشىلۋىنا ىقپال ەتەدى. ءارى بۇل كەيىننەن كوپتەگەن ماسەلەلەردى شەشۋگە مۇمكىندىك تۋعىزادى.
سول كەزەڭدەگى ماعاۋيا سەيىلقىزىنىڭ تاعى ءبىر تاباندىلىعى مەن ىسكەرلىگىنىڭ كورىنىسى – سوكپ ورتالىق كوميتەتى ارقىلى ساتتار نۇرماشۇلى يماشەۆپەن بىرگە تسەلينوگرادتا پوليگرافكومبينات اشۋعا باستاماشىل بولۋى. ونىڭ وسى ەڭبەگى جەرگىلىكتى حالىقتىڭ ورتالىق جانە رەسپۋبليكالىق باسىلىمداردى كۇنبە-كۇن وقۋىنا مۇمكىندىك جاسايدى.
عازيزا يساحان
