قازاق توپىراعى ەپتىلىگى مەن باتىلدىعى شەبەر ۇيلەسكەن شىمىر ۇلدارىمەن, جاۋىرىنى جەرگە تيمەگەن بالۋاندارى ءھام جاۋجۇرەك جاۋىنگەرلەرىمەن داڭقتى. ناعىز ەر جىگىتكە ءتان اسىل قاسيەتتەر ۇلتتىق ويىندارىمىزدا دا كورىنىس تاپقان. قازاق حالقىنىڭ مادەنيەتىمەن ءارى تۇرمىسىمەن بىتە قايناسقان ۇلتتىق كۇرەس ماقتاۋلى ۇلاندارىمىزدىڭ تولقۇجاتى ىسپەتتى. قازاق كۇرەسى, شىن مانىندە, ەرتەدەن ءجىبى ۇزىلمەي كەلەدى. كۇنى بۇگىنگە دەيىن ەل ىشىندە ۇلكەن اۋقىمدا رەسپۋبليكالىق, حالىقارالىق تۋرنيرلەر وتكىزىلۋدە. سونىڭ ءبىرى – استانا تويى اياسىندا ۇيىمداستىرىلاتىن «قازاقستان بارىسى – 2014» ۇلتتىق جوباسى.
ەلباسى نۇرسۇلتان نازارباەۆتىڭ جۇلدەسى ءۇشىن ۇيىمداستىرىلاتىن باسەكە ەلىمىزدە ءتورتىنشى مارتە وتكىزىلمەك. مۇندا «قازاقستان بارىسى» مارتەبەلى تيتۋلىن يەلەنۋگە ءار بالۋان بارىن سالادى. الدىڭعى ءۇش جىلدا ايتۋلى اتاققا ۇلان رىسقۇل, بەيبىت ىستىباەۆ جانە ايبەك نۇعىماروۆ يە بولدى.
ءتورت كەزەڭنەن تۇراتىن بيىلعى جوبا 100 مىڭ قاتىسۋشىنىڭ, 9 مىڭنان استام ونلاين كورەرمەن مەن 6 ميلليونداي وفلاين جانكۇيەرلەردىڭ باسىن قوسپاق. جارىستىڭ اقتىق سايىسى استانا كۇنى اياسىندا 29 ماۋسىمدا ساعات 13.00-دە «سارىارقا» رەسپۋبليكالىق ۆەلوترەگىندە وتەدى. تۋرنير تىكەلەي ەفيردە ۇلتتىق جانە شەتەل تەلەارنالارىنان تاراتىلادى. وسىلايشا سپورت جانكۇيەرلەرى ەلىمىزدىڭ اۋزىن ايعا بىلەگەن ايتۋلى بالۋاندارىنىڭ ءباسىن تاماشالايدى. ءار وبلىستان جانە ەكى قالادان 33 بالۋان قاتىسادى. سونىمەن بىرگە «شىعىس بارىسى» اتانعان «قازاقستان بارىسى – 2013» يەگەرى ايبەك نۇعىماروۆ جۇلدەگە تىگىلگەن «تايتۇياق» پەن 150 مىڭ اقش دوللارىن, چەمپيون بەلدىگىن تاعى دا يەلەنۋ ءۇشىن جەكپە-جەككە شىقپاق. ونىڭ ۇستىنە, تۋرنير ۇيىمداستىرۋشىلارى بيىل «كورەرمەن كوزايىمى» اتتى ارناۋلى سىيلىق ەنگىزىپ وتىر. بۇل – كورەرمەندەر مەن جانكۇيەرلەر ىشىنەن جاڭا اۆتوكولىك يەسىن انىقتايدى. ءدۇبىرلى دودادا «التىن بەلبەۋ» جانە «تايتۇياق» يەگەرى عانا ەمەس, سۋ جاڭا «Hyundai Elantra» اۆتوكولىگىنىڭ يەگەرى انىقتالادى. ول ءۇشىن قۇنى 1000, 2000, 3000 تەڭگەلىك كىرۋ بيلەتتەرىن ساتىپ الىپ, ساتتىلىككە سەنۋ كەرەك. اۆتوكولىكپەن قاتار كورەرمەندەردى كوپ قىزىقتار كۇتۋدە.
بىرەگەي جوبانىڭ دەمەۋشىلەرى مەن سەرىكتەستەرى – «سامۇرىق قازىنا» ءال-اۋقات قورى» اق, «Kaspi bank», «SAT & Company» اق, «Hyundai» ساۋدا ماركاسىمەن «Astana Motors», «قازاقتەلەكوم» اق, «كازاگرو» ۇبح» اق, «پەتروكازاحستان», A’SU, «Sulpak», «YOKOHAMا» ۇيىمدارى.
اسحات رايقۇل
