ەلوردادا ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ كونتسەرت زالىندا رەسپۋبليكالىق باۋقاۋلاردىڭ لاۋرەاتى تولقىن نۇرتاسقىزى «التىن بەسىك – تۋعان جەر» اتتى شىعارماشىلىق كەشىن وتكىزدى. كونتسەرتتە «قورقىت» ەتنو ءانسامبلى, «ناز» بي تەاترى, «ALEM» زاماناۋي بي بالەتى, ەسترادالىق ۆوكال, حالىق ءان بولىمدەرىنىڭ انشىلەرى ونەر كورسەتتى. كونتسەرت انشلاگپەن ءوتتى, زالدا ينە شانشار ورىن بولمادى. حالىق ەستى ءاندى ساعىنعان ەكەن.
قازاق ونەرى اسپانىندا ۇلتتىق اسپاپتارىمەن تاڭعاجايىپ مۋزىكاسىمەن تانىلىپ جۇرگەن «قورقىت» ەتنو انسامبلى جەكە ورىنداۋدا, بەلگىلى انشىلەرمەن بىرگە حالقىمىزدىڭ جىر-جاۋhارىن ۇسىندى. گيننەستىڭ رەكوردتار كىتابىنا ەنگەن «قورقىت» ەتنو ءانسامبلىنىڭ كوركەمدىك جەتەكشىسى – مادەنيەت قايراتكەرى, ءبىلىم سالاسىنىڭ قۇرمەتتى قىزمەتكەرى شولپان قورعانبەك.
تولقىن نۇرتاسقىزى – كوكشە ءوڭىرى, ۋاليحان اۋدانى, سارىادىر اۋىلىندا دۇنيەگە كەلدى. 1995 جىلى مەكتەپ بىتىرگەن سوڭ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ مادەنيەت جانە ونەر فاكۋلتەتىندە وقىعان. ءان جازۋدى ۋنيۆەرسيتەت قابىرعاسىندا وقىپ جۇرگەندە باستادى. سودان بەرى ونەر جولىندا ءبىراز جەتىستىكتەرگە جەتتى. قازاقتىڭ بەلگىلى اقىندارى ف.وڭعارسىنوۆا, س.تۇرعىنبەكۇلى, م.ايتقوجا, ن.ورازالين, م.بەكتەمىروۆا, س.راحىمبەك, ق.ءجۇنىسوۆ, ە.تىلەپبەردىمەن تىعىز شىعارماشىلىق بايلانىستا كوپتەگەن اندەر جازدى. بۇل كۇندە تولقىننىڭ كوپتەگەن اندەرى حالىق جۇرەگىنەن جول تاۋىپ, ىستىق ىقىلاسىنا بولەندى. ەڭبەك جولىندا جاس ونەرپازداردى ونەرگە باۋلىپ, كوركەمدىك جەتەكشى, قازاق راديوسىندا مۋزىكالىق اعا رەداكتور بولدى.
كەشتە تولقىن نۇرتاسقىزىنىڭ ءتول تۋمالارى ورىندالىپ, اندەرى شىرقالدى. ينتەرپريتاتسيالارىنان تۇراتىن كونتسەرتتە كومپوزيتوردىڭ «بالداۋرەن», «اجە ءالديى», «التىن بەسىك – تۋعان جەر», «نوستالگيا», «ءومىر نۇرى», «سارىادىر», «اتامەكەنىم قازاقستان» اندەرى ورىندالدى. قر ەڭبەك سىڭىرگەن قايراتكەرلەرى كلارا تولەنتاەۆا, مەدەت سالىقوۆ, گۇلميرا سارينا, باعدات سامەدينوۆا, حالىقارالىق بايقاۋلاردىڭ لاۋرەاتتارى پەريزات تۇراروۆا, دانيار ساعىنتاي, ايجان كەرىمقۇلوۆا, شاحاريزات سەيداحمەت, عاليا ەسقۇلوۆا, اسىلحان شالقاروۆ, زينات قاسىموۆا, الۋا قالىمبەكوۆا, نۇرجان مەيىرحان, جاندوس يمانباي, وزگەرىس شەرىكباي, پاراسات وتان, مۇراتبەك حايرولدا, ديانا ماي, ايدىن جۇماباي ونەر كورسەتتى.
ءانشى, قازاقستان رەسپۋبليكاسىنا ەڭبەك سىڭىرگەن قايراتكەرى سۆەتلانا ايتباەۆانىڭ ورىنداۋىندا العاش ورىندالعان ءان مۇقاعالي ماقاتاەۆتىڭ سوزىنە جازىلعان «پاي-پاي, ءومىر!» ءانى جۇرەكتەرگە جەتسە, ءانشى ايجان كەرىمقۇلوۆانىڭ ورىنداۋىنداعى «وتان» ءانى, ايدىن جۇمابايدىڭ ورىنداۋىنداعى ءسوزىن سماعۇل راحىمبەكوۆ جازعان «شاعالا ارمان» ءانىن كورەرمەندەر زور ىقىلاسپەن قابىلدادى. حالىقارالىق بايقاۋلاردىڭ جەڭىمپازى ارايلىم بويارينا ورىنداعان «قازاقستان» انىمەن كونتسەرتتىك كەش قورىتىندىلاندى. زالداعى كورەرمەن ورىندارىنان تىك كوتەرىلىپ, دۋ قول شاپالاقتاپ, كەش اۆتورىنا ايرىقشا قۇرمەت كورسەتتى. قازاق ءان ونەرىندەگى نازىك بولمىستى, كەڭ جۇرەكتى تولقىن نۇرتاسقىزىنىڭ ءوزى دومبىرانىڭ سۇيەمەلدەۋىمەن ورىنداعان اندەرى وتانعا, تۋعان جەرگە, اناعا, اكەگە دەگەن ماحابباتتان تۋعان كەرەمەت ونەر تۋىندىلارى ەدى. زالدا وتىرعان اناسىنا دا قۇرمەت كورسەتىلىپ, «ىقىلاس گۇلى» تارتىلدى. ايازدى كۇنى استانادا بولعان كونتسەرتتىك كەش, جۇرەگىمىزگە جىلىلىق ۇيالاتىپ, سانامىزدى سەرپىلتتى.
