ناۋرىز – ۇلى دالا حالقىنىڭ ەرتەدەن بەرى تويلاپ كەلە جاتقان مەرەكەسى. ۇلتىمىزدىڭ جاڭا جىلى دا كوكتەم لەبى بىلىنگەن, كۇن مەن ءتۇن تەڭەلگەن ءاز-ناۋرىزدان باستاۋ الادى.
تاۋەلسىزدىك العاننان بەرى قانشاما ۇلتتىق قۇندىلىعىمىز ۇلىقتالىپ جاتىر. سول قاتاردا قازاقستاندىقتاردىڭ ناۋرىزدى ۇلتتىق مەرەكە, جىل باسى رەتىندە اتاپ ءوتىپ كەلە جاتقانىنا دا ءبىراز ۋاقىت بولدى. ول ەلىمىزدە الدەقاشان بەرەكە-بىرلىكتىڭ مەرەكەسىنە اينالىپ كەتتى. كەيدە «نەگە بىزدە مەرەكە كوپ, ءبارىن تويلاي بەرەمىز بە؟» دەگەن پىكىر دە ايتىلىپ جاتادى. ال مەن حالقىمىزدى بەرەكەمەن تويلايتىن مەرەكەدەن ايىرماسىن دەر ەدىم. ادامنىڭ ءار كۇنى امان ءجۇرۋى, اتقان تاڭنىڭ ارايىن, باتقان كۇننىڭ شاپاعىن كورىپ جۇرگەنىنىڭ ءوزى مەرەكە. سوندىقتان ىزگىلىككە شاقىراتىن, باۋىرمالدىققا باۋليتىن ناۋرىزدى ءبىز قالاي اتاپ وتسەك تە ارتىق ەتپەيدى. بيىل, مىنە, ناۋرىزدى جاڭاشا ۇلگىدە تويلاپ جاتىرمىز. وسى ون كۇندىك مەرەكە اياسىندا قانشاما ۇلتتىق قۇندىلىعىمىز دارىپتەلىپ جاتىر. بۇل, ارينە, قۋانارلىق جاعداي. ەكىنشى تۇرعىدان العاندا, ونىڭ جاڭاشا ۇلگىدە تويلانۋى – ناۋرىزدىڭ ءداۋىر تىنىسىمەن, زامانا لەبىمەن قايتا تۇلەۋى. ويتكەنى بۇل مەرەكەنى تۇركى تىلدەس حالىقتاردىڭ بارلىعى تويلاعانمەن, مازمۇن جاعىنان ايىرماشىلىق تا جوق ەمەس. بيىل قازاق حالقى سول مەرەكەنى تويلاۋدىڭ حالىق اراسىندا ساقتالعان سارقىنشاعىن جۇيەلەپ, ءبارىن ءبىر ارناعا قايتا توعىستىردى.
قازاق حالقى – مەيىرىمدى, باۋىرمال حالىق. ەلىمىزدە باسقا ۇلتتاردىڭ مەرەكەسى دە ۇلكەن قۇرمەتپەن اتالىپ ءوتىپ كەلەدى. ەشبىر ۇلتتىڭ مەرەكەسىنە, سالت-داستۇرىنە شەكتەۋ قويىلىپ جاتقان جوق. سونىمەن قاتار باسقا ۇلتتار دا قازاق حالقىنىڭ ءاز-ناۋرىزىن ىقىلاسپەن اتاپ ءوتۋدى ادەتكە اينالدىرعان. بۇل – ەلىمىزدەگى ايرانداي ۇيىعان بەرەكەنىڭ ءبىر بەلگىسى. الداعى ۋاقىتتا دا ناۋرىز مەيرامى ۇلتتار اراسىنداعى ىنتىماقتى نىعايتاتىن تاتۋلىق مەرەكەسى رەتىندە اتالىپ وتە بەرەدى دەپ سەنەمىن.
بيىل ناۋرىز قاسيەتتى رامازان ايىمەن تۇسپا-تۇس كەلدى. ورازادا تىلەگەن تىلەگىمىز, جاساعان قۇلشىلىعىمىز قابىل بولىپ, ەلىمىزدە ماڭگىلىك تىنىشتىق بولسىن. بىرلىكتەن بيىك مارتەبە, تىنىشتىقتان قىمبات بايلىق جوق. تورتكۇل دۇنيەدەن تىنىشتىق كەتىپ, گەوساياسي جاعداي كۇردەلەنىپ, قانتوگىس كوبەيگەن قازىرگى شاقتا بىزگە اۋىزبىرشىلىكتەن, جۇدىرىقتاي جۇمىلعان بەرەكەدەن قاستەرلى ەشتەڭە جوق. «ءۇي ءىشى الا بولسا, كەرەگە باسى پالە بولادى» دەگەندەي, ىشكى بىرلىگى كەتكەن ەلدىڭ باسىندا باق تا, بايلىق تا تۇرمايدى. سوندىقتان اللا ءبىزدى ەلدىكتەن, بىرلىكتەن ايىرماسىن, كوك تۋىمىز كوك اسپاندا جەلبىرەپ, جالپى جۇرت ەلدىك سانا بيىگىندە توعىسىپ, ۇلان-عايىر ەۋرازيا توسىندە ماڭگىلىك ەل رەتىندە سالتانات قۇرايىق. ەلىمىز امان, جۇرتىمىز تىنىش بولسىن. ناۋرىزدان-ناۋرىزعا امان جەتەيىك. بولاشاعىمىز جارقىن, ۇرپاقتار باقىتتى بولعاي!
ەرسۇلتان بەكتۇرعانوۆ,
قوعام قايراتكەرى, «قۇرمەت», «پاراسات» وردەندەرىنىڭ,
«ەرەن ەڭبەگى ءۇشىن» مەدالىنىڭ يەگەرى
