بۇرناعى كۇنى قالا اكىمدىگىنىڭ «استانا جاستارى» ۇيىمى ورتا مەكتەپتەردىڭ جاس مۇعالىمدەرىمەن كەزدەسۋ ۇيىمداستىردى.
شارادا اتالمىش ۇيىمنىڭ ەرىكتىلەر قوزعالىسىن دامىتۋ ءبولىمىنىڭ جەتەكشىسى ەلۆيرا ەسمۇحانوۆا جاسى 29-دان اسپاعان ۇستازدارعا بىلتىر ۇكىمەت قاۋلىسىمەن بەكىتىلگەن «قازاقستان 2020: بولاشاققا جول» مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسىن ىسكە اسىرۋ جونىندەگى ءىس-شارالار جوسپارىن ءتۇسىندىردى.
جوسپاردىڭ ءبىرىنشى كەزەڭى 2013-2015 جىلدارعا ارنالعان. وندا جاستارعا قولجەتىمدى جانە ساپالى ءبىلىم بەرۋ, سالاماتتى ءومىر سالتىن قالىپتاستىرۋ, قۇقىقتىق مادەنيەتتى ارتتىرۋ, جۇمىسپەن قامتۋ, قولجەتىمدى تۇرعىن ءۇي جۇيەسىن دامىتۋ, مادەني قۇندىلىقتارعا بەي-جاي قاراماۋعا ۇيرەتۋ, جاستاردىڭ بويىندا ازاماتتىق جانە پاتريوتتىق سەزىمدەردى وزدىگىنەن دامىتۋدى ىنتالاندىرۋ, مورالدىق-رۋحاني باعدارلاردىڭ ساباقتاستىعى, عىلىمي-زەرتتەۋ جانە ادىستەمەلىك جۇمىستار, حالىقارالىق جاستار ىنتىماقتاستىعى, جاستار ساياساتىن ينستيتۋتسيونالدىق كۇشەيتۋ ماسەلەلەرى قامتىلعان.
وسىلاردىڭ ىشىنە, قاراپايىم تىلمەن ايتقاندا, ەڭبەك نارىعىنداعى جاعدايدى ساراپتاپ, جاستاردى سوعان سايكەس كاسىپتىك-تەحنيكالىق نەمەسە جوعارى بىلىمگە باعىتتاۋ; جاس, جاڭاشىل عالىمداردى ىنتالاندىرۋ; سپورتتىق نىسانداردى جاستارعا قولجەتىمدى قىلۋ; جاس وتباسىلاردىڭ تۇرعىن ءۇي الۋ مۇمكىندىكتەرىن كەڭەيتۋ ت.ب. بۇگىنگى كۇندەرى وزەكتى بولىپ وتىرعان ماسەلەلەر كىرەدى.
امانعالي شميتۇلى
