قازاق ەلى ۇلىستىڭ ۇلى كۇنى – ناۋرىز مەيرامىن تويلاپ جاتقان تۇستا فۋتبولدان قازاقستان ۇلتتىق قۇراماسى بۋداپەشت قالاسىندا ۆەنگريا قۇراماسىمەن جولداستىق كەزدەسۋ وتكىزىپ, مەرەكە قۇشاعىنداعى وتانداستارىمىزدىڭ قۋانىشىن ەسەلەي ءتۇستى. ماتچ 3:2 ەسەبىمەن قازاقستان قۇراماسىنىڭ پايداسىنا شەشىلدى.
بىردەن ايتايىق, بۇل ويىنعا ۇلتتىق قۇراما ەداۋىر جاڭارىپ شىقتى. كوماندا تىزگىنىن جاڭا باس باپكەر ستانيمير ستويلوۆ ۇستادى. بىرنەشە جاس تالانتتى فۋتبولشىلار ويىنعا قوسىلدى.
ەسكە الاتىن بولساق, سوڭعى جىلدارى ۇلتتىق قۇرامانىڭ ويىنى جانكۇيەر كوڭىلىن ابدەن ءتۇسىرىپ-اق كەتكەن ەدى. بۇرىنعى باس باپكەر بوروديۋك قۇرامانىڭ ويىنشىلارىن دا, ساپاسىن دا جاڭارتا المادى. اسىرەسە, رەسمي ويىنداردا قازاقستان قۇراماسى ەشقانداي قايرات كورسەتە الماي-اق قويدى. قاراڭىز, ەۋروپا چەمپيوناتى مەن الەم بىرىنشىلىگىنىڭ ىرىكتەۋ تۋرنيرلەرى وتكەن سوڭعى ءۇش جىلدا ۇلتتىق قۇرامامىز 20 ويىن وتكىزگەن ەكەن. كورسەتكىشى: 14 رەت جەڭىلىستىڭ اششى ءدامىن تاتتى, 5 ويىندا تەڭ ءتۇستى. نەبارى ءبىر-اق ويىندا جەڭىسكە جەتكەن. سوناۋ 2015 جىلى 13 قازاندا ەۋروپا چەمپيوناتىنىڭ ىرىكتەۋ تۋرنيرىندە لاتۆيا قۇراماسىن 1:0 ەسەبىمەن ەڭسەرگەن ەكەنبىز. وسى ارالىقتا ءبىرتالاي جولداستىق كەزدەسۋلەر دە وتكەنى بەلگىلى. بۇل رەتتە دە قاتتى ماقتاناتىنداي جاعدايىمىز جوق. الەمدىك رەيتينگتە سوڭعى ورىنداردان كورىنەتىن قىرعىزستان مەن كيپر قۇرامالارىنان دا جەڭىلۋگە ءماجبۇر بولدىق.
ەندى, مىنە, جاڭا ماۋسىمدى جاڭارىپ باستاعان قازاقستان ۇلتتىق قۇراماسى جىلدى جەڭىسپەن وتىر. ارينە, بۇل جولداستىق كەزدەسۋ عوي دەپ ايتاتىندار دا تابىلار. دەگەنمەن باستى ايتپاعىمىز, بۋداپەشتتە وتكەن ۇلتتىق قۇرامانىڭ ويىنىنان ۇشقىندى بايقادىق. جىگىتتەردىڭ بويىنان جەڭىسكە دەگەن جىگەردى كوردىك. وسى ويىندى قاراپ وتىرىپ «استانا» كومانداسىن چەمپيوندار ليگاسى مەن ەۋروپا ليگاسىنىڭ توپتىق تۋرنيرىنە شىعارىپ, قازاقستاننىڭ كلۋبتىق فۋتبولىنىڭ دەڭگەيىن بيىككە كوتەرگەن ستويلوۆ ۇلتتىق قۇرامانى دا ساتىلاپ ۇشپاققا شىعارا ما دەگەن وي دا قىلاڭ بەرگەنىن جاسىرمايمىز. باس باپكەرلىكتى قولعا العان بولگار مامانى سەيداحمەت پەن زاينۋتدينوۆتى بىردەن الاڭعا شىعارعانىن اتاپ ايتقىمىز كەلەدى. بۇل – تاۋەكەلگە پارا-پار شەشىم. ماسەلەن, ون سەگىزگە ەندى تولعان ەركەبۇلاندى بىردەن ويىنعا قوسپاي, ادەتتەگىدەي, ويىن سوڭىنا جاقىنداعاندا شىعارىپ جاتسا, بۇل بالا بۇلاي ويناپ كەتەر مە ەدى؟! ەركەبۇلان سەيداحمەتتى رەسەيدىڭ پرەمەر ليگاسىنداعى «ۋفا» تەگىن شاقىرماعانىن ستويلوۆ ەسكەردى جانە ءبىلدى. ناتيجەسى ەركەبۇلان شىن تالانت ەكەنىن كورسەتىپ بەردى. باقتيار زاينۋتدينوۆ تا اشىلىپ سالا بەردى. وسى تۇستا ماتچ دەرەكتەمەسىنە كوز سالساق, مۇرتازاەۆ 6-مينۋتتا ەسەپ اشسا, ارادا ءتورت مينۋت وتكەندە زاينۋتدينوۆ ەسەپتى ەسەلەيدى. ال 30-مينۋتتا ەركەبۇلان تاماشا گول سوعادى. ۇشەۋى دە جاس فۋتبولشىلار. وسىندايدا شىن تالانتتى تانىپ-ءبىلۋ دە تالانت پا دەپ ويعا قالاسىڭ. وسىعان دەيىن قۇرامانىڭ ساپىندا تالاي ويناپ ىسىلعان جىگىتتەرىمىز دە بۇل كەزدەسۋدە ەرەكشە كوڭىل كۇيمەن ويناعانى اڭعارىلدى. بۇل دا باپكەردىڭ باپتاۋىنان بولدى ما دەگەن ويعا بەرىلەسىڭ.
سونىمەن, قازاقستان ۆەنگريا قۇراماسىن ءوز الاڭىندا تىزە بۇكتىردى. ال بىلە بىلسەك, ۆەنگريا قۇراماسى 2016 جىلعى ەۋروپا چەمپيوناتىندا توپتىق تۋرنيردە جەڭىمپاز اتانىپ, بىرىنشىلىكتىڭ 1/8 كەزەڭىنە شىققانى بەلگىلى. ايتپاقشى, بيىلدان باستاپ ۋەفا-نىڭ ۇلتتار ليگاسى جارىسى ىسكە قوسىلدى. بۇل جارىسقا رەيتينگى تومەن ەلدەردىڭ قۇرامالارى توپ-توپقا ءبولىنىپ, ەۋروپا چەمپيوناتىنا بەرىلەتىن جولدامانى ساراپقا سالاتىن بولادى. قازاقستان بۇل سىندا گرۋزيا, لاتۆيا, اندوررا قۇرامالارىمەن وينايتىن بولادى. وسىلاردىڭ وزعانى قۇرلىق بىرىنشىلىگىنە قاتىسادى. دەمەك, ۇلتتىق ليگا ستويلوۆقا ۇلكەن سىناق ءارى باستى ماقسات بولماق.
كەشە ءبىزدىڭ قۇراما بولگاريا قۇراماسىمەن كەزدەستى. باس باپكەر ستويلوۆ ءوزىنىڭ وتانداستارىنا قارسى قانداي ويىن تاكتيكاسىن ۇستانار ەكەن؟ ەڭ باستىسى, جاستاردى قاتارعا قوسا بەرسە ەكەن. تالانتتى فۋتبولشىلاردى تاسادا قالدىرماي, ولاردىڭ ۇلتتىق نامىسىن باستى قارۋعا اينالدىرا بىلسە دەيمىز. ويتكەنى ۇلتتىق نامىس ءبىرىنشى كەزەككە قويىلسا, جەڭىس كەلمەي قويمايدى.
عالىم قوجابەكوۆ
– قازاقستان ۇلتتىق قۇراماسى جاڭا باپكەرمەن تاماشا ناتيجە كورسەتىپ, بارشا قازاق جۇرتىن قۋانتىپ تاستادى. الايدا الدا جاڭا سىناقتار كۇتىپ تۇر. بارلىق كەزدەسۋگە جاقسى دايىندىقپەن كەلۋ كەرەك. ۆەنگريا قۇراماسى وتە تاجىريبەلى بولعانىمەن, ءبىزدىڭ فۋتبولشىلار ويىننىڭ العاشقى مينۋتىنان باستاپ جەڭىسكە دەگەن جىگەرىن بايقاتتى. ويىن ءدال وسىلاي باستالادى دەپ ەشكىم كۇتپەپ ەدى. شىنى كەرەك, ءار فۋتبولشى ەل ءۇشىن كۇرەستى. قازىر ۇلتتىق قۇراماعا قولايلى جاعداي جاسالىپ وتىر. ەڭ باستىسى, جاقسى ناتيجە بولۋ كەرەك. بۇل – ءبىزدىڭ باستى ماقساتىمىز.
