استانا اكىمدىگىندە الەۋمەتتىك ءالسىز وتباسىلاردىڭ تسيفرلى دەرەكتەر قورى قۇرىلدى. قازىرگى ۋاقىتتا بازادا 10095 وتباسى تىركەلگەن.
استانا قالاسى اكىمىنىڭ ورىنباسارى ماليكا بەكتۇروۆا بۇل جۇمىس الەۋمەتتىك قورعاۋ جانە جۇمىسپەن قامتۋ سالاسىنىڭ تسيفرلاندىرۋ بولىگى ەكەنىن اتاپ ءوتتى. اتالمىش دەرەكقور قالا اكىمدىگىنە كومەككە مۇقتاج وتباسىلار جانە ونىڭ قاجەتتىلىكتەرى تۋرالى اقپاراتتى ءبىلىپ وتىرۋعا مۇمكىندىك بەرەدى جانە اتاۋلى الەۋمەتتىك كومەكتى نەعۇرلىم ءتيىمدى كورسەتۋگە سەپتىگىن تيگىزەدى.
– ءبىز بۇل دەرەك قورىنا 32 اقپاراتتىق دەرەككوزدى توپتاستىردىق, مەملەكەتتىك جانە جەكە بازالاردى بىرىكتىردىك. ول اقپاراتتار دەرەككوز بازاسىن تولىقتىرىپ, بىزگە ءار وتباسى تۋرالى تولىق مالىمەت بەرەدى, – دەدى اكىم ورىنباسارى.
دەرەككوز قورىندا اقپاراتتار ىرىكتەلەدى. وندا اتاۋلى الەۋمەتتىك كومەك الۋعا بولاتىن كوپبالالى, از قامتىلعان جانە مۇگەدەك جان بار وتباسىلار تۋرالى اقپارات كورسەتىلەدى. جۇمىسپەن قامتۋ جانە حالىقتى الەۋمەتتىك قورعاۋ باسقارماسىنىڭ, اۋداندىق اكىمدىكتەر, مەكتەپ قىزمەتكەرلەرى, پوليتسيانىڭ ۋچاسكەلىك ينسپەكتورلارى وتباسى مۇشەسىنىڭ كەز كەلگەنىنىڭ جسن-ءىن ەنگىزىپ, بالالاردىڭ اتا-اناسى قايدا جۇمىس ىستەيدى, بالالار قايدا وقيدى, وتباسى قانداي جاردەماقى الادى, قانداي مۇلىك يەلەنەدى, ولاردىڭ تۇرعىن ءۇي جاعدايىنىڭ قانداي ەكەندىگىنە قاتىستى تولىق اقپارات الادى. بۇل بازا ۇنەمى تولىقتىرىلىپ وتىرادى. سونداي-اق كوپبالالى, از قامتىلعان وتباسىلارمەن جۇمىس ىستەيتىن قىزمەتكەرلەر ءۇشىن قوسىمشا ازىرلەندى. ءار قىزمەتكەر بەلگىلى ءبىر وتباسىعا قاتىستى اقپاراتتى تولىقتىرا الادى. بازادا وتباسىنىڭ قازىرگى قاجەتتىلىكتەرى جانە ول ماسەلەلەر قالاي شەشىلىپ جاتقانى دا كورسەتىلەدى.
– ەگەر ءۇي پەشپەن جىلىتىلىپ, الايدا ۋلى گاز داتچيكتەرى ورناتىلماسا, سول ولقىلىقتى جويامىز. بىزدە بالالارمەن الەۋمەتتىك پەداگوگ جۇمىس ىستەيتىندىگى, وزدەرىنە ارنالعان كەڭسە زاتتارىن الاتىندىعى, مەكتەپكە دايىندىعى, ولاردىڭ وزدەرىنە تيەسىلى كومەكتى الىپ وتىرعاندىعى سەكىلدى ماسەلەلەر تولىعىمەن كورسەتىلىپ تۇرادى, سونداي-اق ازاماتتاردىڭ جەكە ءوتىنىش-شاعىمىن كورىپ وتىراتىن بولامىز. مىسالى, جەرگىلىكتى اتقارۋشى ورگاندارعا جازىلعان ءوتىنىش قالاي شەشىلىپ جاتىر؟ مىنە, وسىنىڭ ءبارىن قاداعالاپ وتىرامىز, – دەدى اكىم ورىنباسارى.
