«استانا تاڭداۋى» بايقاۋىنا №15 مەكتەپ-ليتسەي ۇجىمى وزدەرىنىڭ قۇرمەت تۇتاتىن ۇستازى گۇلزادا بەردياروۆانى ۇسىنىپ وتىر.
گۇلزادا قيانتايقىزى وتىز جىلدان استام ۋاقىت بويى پەداگوگيكا سالاسىندا ۇزدىكسىز ەڭبەك ەتىپ كەلە جاتىر ەكەن. گەوگرافيا پانىنەن ساباق بەرەتىن مۇعالىم ماماندىقتى جۇرەك قالاۋىمەن تاڭداعان دەيدى ارىپتەستەرى. جەتىساي پەداگوگيكالىق ۋنيۆەرسيتەتىن تامامداعان ول سوڭعى بەس جىلدان بەرى №15 مەكتەپتە ەڭبەك جولىن جالعاستىرىپ كەلەدى. از ۋاقىتتىڭ ىشىندە گۇلزادا قيانتايقىزى وقۋشىلاردى بىلىمگە, شىعارماشىلىققا, ەڭبەكسۇيگىشتىككە باۋلي وتىرىپ, وقىتۋ ۇردىسىندە جاڭا تەحنولوگيالاردى قولدانۋ ارقىلى شىعارماشىلىقپەن جۇمىس ءىستەيتىن دارىندى ۇستاز ەكەنىن كورسەتە ءبىلدى. مۇعالىم ساباق بەرۋدىڭ ءداستۇرلى جانە ءداستۇرلى ەمەس تۇرلەرىن ەركىن مەڭگەرگەن. ول كىرىكتىرىلگەن جانە ستاندارتتى ەمەس ساباق تۇرلەرىن كەڭىنەن قولدانىپ, ينفورماتيكا جانە جاراتىلىستانۋ پاندەرىمەن بايلانىستىرا وتىرىپ, جاڭاشىل تەحنولوگيا ەلەمەنتتەرىن ەنگىزدى. جاڭاشىل پەداگوگتىڭ ەڭبەگى ەش كەتكەن جوق. شىعارماشىل مۇعالىمدەردىڭ اراسىندا وتكىزىلگەن بايقاۋدا «ءىزدەنىمپاز ۇستاز» نوميناتسياسىن جەڭىپ الدى.
«پسيحولوگيالىق عىلىمدار اكادەمياسىنىڭ قۇرمەتتى مۇشەسى» ديپلومىمەن ماراپاتتالدى.
ءبىلىمىن ۇنەمى جەتىلدىرىپ وتىرۋدى ءجون كورەتىن مامان عىلىمي-پراكتيكالىق جۇمىستارعا دا بەلسەنە اتسالىسادى. سونىڭ ءبىر مىسالى رەتىندە مۇعالىمنىڭ ورتا مەكتەپتەرگە ارنالعان وقۋ باعدارلاماسىنا ەكسپەرتتىك جۇمىس ءجۇرگىزگەنىن اتاپ وتۋگە بولادى. سونداي-اق, 7-سىنىپ باعدارلاماسىنا لايىقتالىپ جاسالعان «ماتەريكتەر مەن مۇحيتتار گەوگرافياسى», «جالپى جەر اتاۋلارى جانە ەسەپتەر جيناعى» اتتى شىعارماشىل مۇعالىمدەردىڭ ءىس-تاجىريبەلەر جيناعى دا گۇلزادا بەردياروۆانىڭ ۇيىمداستىرۋىمەن جيناقتالىپ, باسپاعا ازىرلەندى. بۇعان قوسا, شىعارماشىل مۇعالىمدەردىڭ ءىس-ءتاجىريبەسىنەن جيناقتالعان «ويىنمەن وقۋشى ويىن دامىتۋ» ادىستەمەلىك نۇسقاۋ ەڭبەگى توپتاستىرىلدى.
ۇستازدىڭ شاكىرتتەرى دە كوپتەگەن بايقاۋلاردان بايگە اكەلىپ ءجۇر. اتاپ ايتقاندا, جالپى ءبىلىم بەرەتىن پاندەردەن رەسپۋبليكالىق عىلىمي جوبالار كونكۋرسى مەن كونفەرەنتسيالاردا اينارا ءسالىمگەرەەۆا, ايىمتورى شايمەردەنوۆا, سارسەن ەلدار, داناگۇل قابدۋللينا سىندى وقۋشىلارى جۇلدەلى ورالدى.
وقىتۋدا كورنەكى قۇرالداردى قولدانىپ, وقىتۋدىڭ عىلىمي-پەداگوگيكالىق نەگىزدەلگەن ءادىس-تاسىلدەرىن تاڭداپ, وقۋشىلاردىڭ تەوريالىق جانە پراكتيكالىق بىلىكتىلىگى مەن داعدىلارىنا دەن قوياتىن مۇعالىم ءبىلىم ساپاسى مەن وقۋ دەڭگەيىنىڭ كوتەرىلۋىنە سەپتىگىن تيگىزۋدە.
بۇگىنگى كۇنى گۇلزادا قيانتايقىزى – مەكتەپتىڭ «تابيعي عىلىم» جاراتىلىستانۋ ادىستەمە بىرلەستىگىنىڭ جەتەكشىسى, بىلىكتى مامان, ءوز كاسىبىنىڭ شەبەرى, شاكىرتتەرىنىڭ سۇيىكتى ۇستازى. مىنەزگە باي, اشىق-جارقىن, كەڭپەيىلدى ۇستاز ءار وقۋشىنىڭ جۇرەگىنە جول تاۋىپ, جىلى سوزىمەن باۋراپ, ەلىمىزدىڭ بولاشاق ازاماتتارىن وقىتىپ, تاربيەلەۋ جولىندا ەسەلى ەڭبەك ەتۋدە.
قىمبات نۇرعالي
