جاڭعىرتۋ باعدارلاماسىنىڭ ءوزى جەڭىلدىك
2011-2020 جىلدارعا ارنالعان «تۇرعىن ءۇي-كوممۋنالدىق شارۋاشىلىعىن جاڭعىرتۋ» باعدارلاماسى بويىنشا تۇرعىن ۇيلەردى كۇردەلى جوندەۋدەن وتكىزۋگە بولادى. وسى باعدارلاما جونىندە استانا قالاسى تۇرعىن ءۇي ينسپەكتسياسى باسقارماسى زاڭ جانە قۇجاتتامالىق قامتاماسىز ەتۋ ءبولىمى, پەرسونالدى باسقارۋ قىزمەتىنىڭ ءبولىم باسشىسىنىڭ مىندەتىن اتقارۋشى رينات ساعىناەۆتان سۇراپ بىلگەن ەدىك.
– بۇل باعدارلاماعا قاتىسۋ ءۇشىن تۇرعىن ءۇي يەلەرىنە قانداي تالاپتار قويىلادى?
– باعدارلاما شارتىنا سايكەس تۇرعىندار قايتارىمدىق نەگىزدە بيۋدجەتتىك قارجى ەسەبىنەن ۇيلەرىنە كۇردەلى جوندەۋ جۇرگىزە الادى. باعدارلاماعا قاتىسۋ ءۇشىن, بىرىنشىدەن, تۇرعىن ءۇي كوندومينيۋمى نىسانىن ادىلەت ورگاندارىندا تىركەۋ كەرەك. ەكىنشىدەن, تۇرعىن ءۇيدىڭ كوندومينيۋم نىسانىنىڭ باسقارۋ ورگانىن تاڭداۋ كەرەك (پيك, باسقارۋشى كومپانيا جانە ت.ب.). سونداي-اق, پاتەر يەلەرىمەن جالپى جينالىس وتكىزىپ, باعدارلاماعا قاتىسۋ ءۇشىن تۇرعىنداردىڭ كەم دەگەندە
66,7%-ىنىڭ كەلىسىمىن الۋ قاجەت.
– الداعى ۋاقىتتا قانشا ۇيگە جوندەۋ جۇرگىزىلمەك؟
– قازىرگى ۋاقىتتا تكش جاڭعىرتۋ باعدارلاماسى اياسىندا ەلوردادا 20 كوپ پاتەرلى تۇرعىن ۇيگە كۇردەلى جوندەۋ جۇرگىزىلدى. سونىڭ ىشىندە 12 ءۇي – الماتى اۋدانىندا, 8-ءى سارىارقا اۋدانىندا ورنالاسقان. جالپى, پاتەرلەر سانى 1713-ءتى قۇرايدى.
بۇگىنگى تاڭدا 2015 جىلعا ارنالعان باعدارلاماعا قاتىسۋشىلاردىڭ ءتىزىمى جاسالۋدا. استانادا 31 تۇرعىن ءۇي جالپى كوندومينيۋم مۇلكىنە كۇردەلى جوندەۋ جۇرگىزۋ تىزىمىنە ەنگىزىلىپ قويدى.
– باعدارلاما كولەمىندە تاعى قانداي جەڭىلدىكتەر قاراستىرىلعان?
– بۇل باعدارلامانىڭ ءوزى – جەڭىلدىك.
ال, تۇرمىسى تومەن وتباسىلارعا جەرگىلىكتى بيۋدجەت ەسەبىنەن تۇرعىن ءۇي ءجوندەۋگە كەتكەن شىعىندارىن تولەۋگە كومەك كورسەتىلەدى. بۇل تۋرالى تولىق اقپاراتتى قالا تۇرعىندارىنىڭ تىكەلەي ءبىزدىڭ مەكەمەدەن الۋىنا بولادى.
نۇريسلام قۇسپانعالي