ەلورداداعى وقۋشىلار سارايىندا «ايالاعان استانا» اتتى رەسپۋبليكالىق پوپ-ورىنداۋشى بالالار بايقاۋىنىڭ اشىلۋ ءراسىمى ءوتتى.
بايقاۋدىڭ ءبىرىنشى كەزەڭى – ىرىكتەۋ تۋرىندا رەسپۋبليكانىڭ 14 وبلىسى جانە الماتى مەن استانا قالالارىندا كاستينگتەر وتكىزىلىپ, 950-دەن استام بالا باق سىنادى. ونەرپازداردىڭ ىشىنەن ۇزدىكتەرىن ءمادينا سادۋاقاسوۆا, الىشەر ەگەمبەرديەۆ, بۇركىت, ايقىن تولەپبەرگەن, ءمولدىر اۋەلبەكوۆا, باتىر باينازاروۆ, دانيار وتەگەن
(«رينگو»), الماس كىشكەنباەۆ, جانبولات بەدەلحان («وردا») جانە التىناي جوراباەۆا سىندى تانىمال ەسترادا جۇلدىزدارى ىرىكتەپ, جارتىلاي فينالعا 12 ۇمىتكەر جولداما الدى.
بۇل بايقاۋدىڭ باستى ماقساتى – بيىل ارتەكتە وتەتىن «نوۆايا دەتسكايا ۆولنا» بايقاۋىندا قازاقستاننىڭ اتىنان ونەر كورسەتەتىن جانە ەل نامىسىن قورعاپ شىعاتىن جاس ءانشىنى تاڭداپ الۋ.
شوۋ شىلدە ايىنىڭ 4, 5, 6 كۇندەرى «ەۋرازيا» تەلەارناسىندا تىكەلەي ەفيردەن كورسەتىلەدى. بايقاۋ جەڭىمپازىن انىقتاۋعا كورەرمەندەر دە سمس حابارلامالار جولداۋ ارقىلى ۇلەس قوسا الادى. ال, جۇزدەن جۇيرىك شىققان جەڭىمپازدىڭ اتى 6 شىلدە كۇنى وتەتىن گالا-كونتسەرتتە بەلگىلى بولادى.
ەربول جانات
