استانا قالاسىنداعى ا.يمانوۆ كوشەسىندەگى ەكىنشى ءۇيدىڭ قابىرعاسىنا بەلگىلى جۋرناليست-پۋبليتسيست, ءباسپاسوز جانە قوعام قايراتكەرى, اقمولا وبلىستىق «ارقا اجارى» گازەتىنىڭ بۇرىنعى باس رەداكتورى, مارقۇم وكتيابر قايىرۇلى الىبەككە ارنالعان ەسكەرتكىش تاقتا ورناتىلدى. قارىمدى قالامگەر وسى ۇيدە 1979-2010 جىلدار ارالىعىندا تۇرعان ەدى.
سوناۋ 1961 جىلى قازاق مەملەكەتتىك ۋنيۆەرسيتەتىن بىتىرگەن ەرلى-زايىپتى وكتيابر مەن راحيا الىبەكوۆتەر ەڭبەك جولدارىن اقمولانىڭ ولكەلىك «تىڭ ولكەسى» («ارقا اجارى») گازەتىنەن باستاعان ەدى. استانا قالاسى مەن اقمولا وبلىسىنىڭ وركەندەۋىنە وراسان ۇلەس قوسقان وكتيابر الىبەكتىڭ ەسكەرتكىش تاقتاسى اشىلۋىنا ارنالعان شاراعا قالانىڭ جانە وبلىستىڭ زيالى قاۋىمى, وزىمەن قىزمەتتەس بولعان ارىپتەستەرى, تۋىسقاندارى مەن بالا-شاعاسى قاتىستى. سالتاناتتى جيىندى استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ اشىپ, قالامگەر اعانىڭ ءومىربايانىنان ماعلۇمات بەرىپ, بىرقاتار ازاماتتارعا ءسوز بەردى. استانا قالاسى ءماسليحاتىنىڭ حاتشىسى سانسىزباي ەسىلوۆ كورنەكتى قالامگەردىڭ ونەگەلى ءومىر جولىن, ونىڭ ءوڭىردى وركەندەتۋگە سىڭىرگەن ولشەۋسىز ەڭبەگىن اتاپ ءوتتى. اقيىق اقىن نۇرعوجا وراز بەن «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ ءوڭىردىڭ ءباسپاسوزىن دامىتۋعا وراسان ەڭبەك سىڭىرگەن وكتيابر الىبەكتىڭ ازاماتتىق بولمىسى مەن شىعارماشىلىق جۇمىسى تۋرالى ەستەلىك ايتتى. «ارقا اجارى» گازەتىنىڭ باس رەداكتورى قايىرباي تورەقوجا دا ەلگە قادىرلى بولعان ازاماتقا وسىنداي قۇرمەت كورسەتكەنى ءۇشىن قالا باسشىلىعىنا گازەت ۇجىمى اتىنان ريزاشىلىعىن ءبىلدىردى. جۋرناليست-اقىن ءىنىسى امانكەلدى جۇمابەك جۇرەكجاردى ولەڭىن وقىدى.
ەسكەرتكىش تاقتا اشىلعان سوڭ وكتيابر اعانىڭ جارى, بەلگىلى جۋرناليست راحيا الىبەكوۆا مەن بالا-شاعاسى جينالعان قاۋىمعا قۇدايى اس بەرىپ, تاعزىم ەتۋگە ارنايى كەلگەن ازاماتتارعا ريزاشىلىعىن ءبىلدىردى.
عالىم قوجابەكوۆ
