«Астана» – Еуролигада
Өткен жексенбі күні еліміздің биылғы футбол маусымы мәресіне жетті. Соңғы ойынды «Астана Арена» стадионында тамашаладық. Дәстүр бойынша Қазақстан кубогының жеңімпазы анықталды. Жасыл алаңда «Астана» мен «Ертіс» күш сынасты.
Бұл ойын, шыны керек, «Астана» үшін өте маңызды болатыны алдын ала белгілітін. Өйткені, ұлттық біріншілікте жүлдесіз қалған елордалық команда алдағы жылы УЕФА-ның Еуропа лигасы турниріне қатысуы тек Қазақстан кубогын жеңіп алған жағдайда ғана мүмкін болар еді. Ал биылғы чемпионатта күміс жүлдегер атанған «Ертіс» үшін еуропалық турнирдің мәселесі шешіліп қойды дегенмен, павлодарлық команданың ел кубогын ұстамағалы он жылдай болып қалған екен. Сондықтан да Талғат Байсуфиновтың шәкірттері үшін де кубокты жеңіп алу күн тәртібінде тұрғаны сөзсіз еді.
Осылайша, екі жақтың да жеңіске деген жігері қатар түскен тартысты ойын шынымен де қызықты өтті. Елордалық команданың әрі Қазақстан ұлттық құрамасының бас бапкері Мирослав Беранек өз футболшыларын дәл осы матчқа әбден әзірлегені бірден байқалды. Олай дейтініміз, ойынның бесінші минутында алаң иелері есеп ашып үлгерді. Легионер Фокси Кетеовамоның «Ертіс» қақпасына қарай бағыштаған айыпдобын команда капитаны Қайрат Нұрдәулетов баспен ұрып, Котляр қорғаған қақпаға тулатып түсірді. Одан әрі де астаналықтар ойын қарқынын бәсеңдеткен жоқ. «Ертіс» те қарап қалмады. Бірнеше рет Эрич қақпасына қауіп төндіре білді. Алайда, астаналықтардың жеңіске деген құштарлығында шек болмағандай. Соның нәтижесінде ойынның 85-ші минутында Таңат Нөсербаев тағы бір тамаша гол соқты. Есеп 2:0! Бұл жолы да камерундық Кетеовамо әдемі пас шығарып бергенін айтуға тиіспіз. Ал павлодарлықтар қанша тырысқанымен есепті өзгертуге шамалары жетпеді. Сөйтіп, «Астана» Қазақстан кубогының иегері атанды.
Қазақстан кубогы елордалық команда үшін жаңа тарихи кезең ашты. Алдағы жылы «Астана» Еуропа лигасында өнер көрсететін болады.
Астаналықтармен қатар 2013 жылы Еуропа лигасы турнирінде биыл премьер-лига чемпионатында күміс жүлдегер атанған «Ертіс» пен қола медаль иегері «Ақтөбе» сынға түсетін болады. Ал қатарынан екінші рет ел чемпионы атанған Қарағандының «Шахтер» командасы тағы бір мәрте УЕФА-ның Чемпиондар лигасында өнер көрсетеді. Мұндай мәртебелі жарысқа бірінші рет қатысатын астаналық командаға сәттілік тілейміз.
Биылғы чемпионаттың қорытындысында премьер-лигадан «Оқжетпес» және «Сұңқар» шығып қалса, бірінші лигада топ жарған Алматы облысының «Іле-Сәулет» және Өскеменнің «Восток» командалары күштілердің қатарына қосылады.
2014 жылы өтетін әлем чемпионатының іріктеу турниріне қатысып жатқан Қазақстан құрамасының Германия құрамасымен өткізетін кезекті ойыны алдағы жылдың 22 наурыз күні бұрын хабарланғандай Алматы қаласында емес, елордамыздағы «Астана Арена» стадионында өтетін болады.
Ғалым ҚОЖАБЕКОВ