Қазақстанның Индонезиядағы Елшісі Сержан Әбдікәрімов Индонезияның Білім және мәдениет министрінің орынбасары Хилмар Фаридпен кездесіп, мәдени-гуманитарлық және білім беру салаларындағы екіжақты қатынастарды кеңейту мәселелерін жан-жақты талқылады, деп хабарлайды astana-akshamy.kz.
Дипломат Астана мен Джакарта арасындағы өсіп келе жатқан ынтымақтастықтың ағымдағы жағдайы мен келешегі, жетекші университеттер арасындағы келісімдердің іске асырылуы және студенттермен алмасу, екі елдің ұлттық кітапханалары, Индонезияның білім беру мекемелеріндегі қазақ тарихы мен мәдениеті орталықтарының қызметі туралы айтып берді.
Индонезияда музыкалық топтар мен оркестрлердің концерттерін, қазақ сәні мен киносының көрсетілімдерін өткізудің ұйымдастырушылық мәселелерін талқылауға ерекше назар аударылды.
Министрдің орынбасары елдегі жыл сайынғы халықаралық және ұлттық шығармашылық фестивальдар туралы айтып, қазақ серіктестерін оларға қатысуға шақырды, сондай-ақ Қазақстанның мәдени-гуманитарлық іс-шараларын өткізу бойынша қолдау көрсетуге дайын екенін растады.
Сұхбаттасушылар аталған жоспарларды жүзеге асыру бойынша тығыз жұмысты жалғастыруға келісті.
