Астана үздіктері анықталды
Бас қала тұрғындарының ішінен өз ісіне адал, еңбегі халықтың көңілінен шыққан жандарды көпшілікке танытуды мақсат еткен «Астана таңдауы» байқауы өз мәресіне жетті. Қала тұрғындары үдеден шыққан үздіктердің есімін анықтады.
Осыдан бір жарым ай бұрын басталған байқауға қала тұрғындарынан 170 өтінім келіп түскен. Елордалықтар Астана қаласы әкімдігінің сайтына кіріп, өздері қалаған мамандық иелеріне онлайн режимінде дауыс берді.
Жиырма күннің ішінде дауыс беруге 90 мыңға жуық адам қатысқан.
Сонымен, жеңімпаздардың есімін атасақ, «Үздік педагог» атағының иегері Райымбек батыр атындағы №50 «Қазғарыш» мектеп-лицейінің мұғалімі Рабиға Иманқұлова болды. Оған жиырма мыңнан астам адам дауыс берген. Адам жанына араша түсетін дәрігерлер қашан да құрметке лайық. №1 Қалалық аурухана қызметкері, 23 жылдық еңбек өтілі бар Марат Абдулов «Үздік дәрігер» аталымында жеңімпаз деп танылды.
Тәртіп сақшыларының арасынан «Үздік учаскелік инспектор» атағын Сарыарқа ауданының 24 жастағы учаскелік инспекторы Мұрат Ширтаев иеленді. «№1 Автобус паркінің» қоғамдық көлік жүргізушісі Қанат Құлтаев өз саласының үздігі атанды. Жол жөндеуші Вячеслав Шевченко бұл байқауда 72 дауыс алды. Осы жетістікпен «ҚазақАвтожол» Ақмола филиалының қызметкері, 32 жылдық еңбек өтілі бар құрметті азамат «Үздік жолшы» атанды. «Астана-Жылутранзит» АҚ-ның Реттеу және тұтынушыларды есепке алу қызметінің бастығы Рауза Кәкімова «Энергетик» аталымы бойынша үздіктер қатарынан көрінді. Ал үздік құрылысшыға – 1 734 адам дауыс берген. Мұндай атаққа «Алтын ХХI» ЖШС қызметкері Сүндет Ізбасарұлы Үмбетов ие болды.
Осылайша жеті мамандықтың үздік өкілдері елге танымал болды.
Астана әкімдігі сайтындағы халықтық дауыс беру жүйесі тек бір адамға бір рет электронды дауыс беруге мүмкіндік туғызды. Осы тұрғыдан алғанда, дауыс беру өте шынайы және әділетті өтті.
Жалпықалалық «Астана таңдауы» байқауының жеңімпаздары 6 шілде күні Конгресс-холл сарайында арнайы марапатталады.
Гүлмира Аймағанбет