Ел Тәуелсіздігінің 25 жылдығы қарсаңында «Kazakhstan Kids Fashion Show-2016» атты балалар сән көрсетілімі отандық дизайнерлердің туындыларын паш етті.
«Kazakhstan Kids Fashion Show-2016» жобасы осымен төртінші мәрте Махаббат Есен мен Жұлдыз Сейсенбекованың ұйымдастыруымен өтті. 4-16 жас аралығындағы қатысушылар балаларға арнаулы тігілген топтамалармен сән шеруіне шықты. Көрсетілім шымылдығын «Асыл-дизайн» сән үйінің жетекшісі Айдархан Қалиевтің коллекциясы ашты. Сән әлемінде 25 жыл бойы еңбек етіп келе жатқан дизайнердің киімдері қазақылыққа тұнып тұр. Көрсетілімнің өзі де қазақы нақышта, халық және эстрада әндерінің сүйемелдеуімен өтті.
Екінші болып дизайнер Әнел Райым өзінің «KaroMeli» атты сән топтамасын таныстырды. Сахнаға жобаның ең кішкентай қатысушылары үлпілдеген көйлектерімен шығып, көрермен көзайымы атанды.
«Glasman» сән үйі ер балаларға арналған костюмдермен көзге түсті. Ал «ILATI» қыздардың нәзіктігін айқындай түсетін шілтер матасын ұтымды пайдаланды. Одан бөлек, Майя Жұманбекова, Динара Чакарова сынды отандық дизайнерлер мен Samidel, Vesta, LOGOVO сән үйлері жобаға қатысып, сәнқойлардың көңілінен шықты. Осы ретте біз «I Am Different» топтамасымен төбе көрсеткен Зарина Ақшолақованы әңгімеге тарттық.
– Балалар топтамасын алғаш рет ұсынып отырмын. Маған жасөспірімдермен жұмыс істеу бұйырды. Киімдер де өтпелі кезеңдегі жеткіншектерге лайықты етіп тігілді. Көбінесе ақ, қара және жалбыз түсті жасылға басымдылық берілді. Бір-біріне үйлеспейтін материалдарды тоғыстырып, тұтас туынды жасап шығаруға тырыстым. Мақсат – өсіп келе жатқан ұрпақтың ерекше екенін көрсетіп, даралығын таныту, – дейді Зарина.
Әйел адамы сәнге жақын келетіні белгілі, дегенмен көрсетілімде балаларына қолдау көрсетуге келген әкелерді де кездестірдік. Соның бірі – 11 жасар Елжанның әкесі Ерлан жоба туралы мынадай пікір білдірді. «Бастапқыда қарсы болдым, кейін балам өзі қатысуға ниетті екенін біліп, бетін қақпадым. Сахнада жүріп, бой түзеп, ашыла бастады. Баладан сәнқой жасауды көздемейміз, ұяңдығынан арылып, сенімділігі артса деймін» деді ол.
Бес баланың анасы Айжан Садықова да бұл ойды жалғастырды. «Балалардың тәрбиесі тікелей менің мойнымда. Былтыр сән көрсетіліміне төрт балам қатысса, биыл Аружан, Ханзада, Айбарыс есімді балаларым өздерін модель ретінде байқап көруде. Ең үлкені – 13, ал кішісі – 4 жаста. Үлкен қызым Аружанның жүріс-тұрысында, сөйлеу мәнерінде өзгеріс байқадым, талғамы түзеліп, қалыптасып қалды. Былтыр екінші қызыммен жоба атынан Миланға барып, балалар сән топтамасын таныстырдық. Осы жылы қазақтың ұлттық киім үлгілерін таныстыруға Сан-Мариноға жолдама алдық» деп сөзін аяқтады ол. Балалардың өнерін тамашалауға көп балалы ана жұбайымен бірге келген екен. Көрсетілім отбасы құндылықтарын насихаттайтыны осыдан-ақ белгілі.
Кеш соңында жобаның продюсері Махаббат Есенмен тілдесуге мүмкіндік алдық.
– Жүктелген жауапкершілікті абыроймен алып шықтық деуге болады, үмітіміз ақталды. Бүгін – біз үшін, балалар мен олардың әке-шешелері үшін үлкен мереке. Астананың аязы шоуды тамашалауға келген көрерменге тосқауыл болмады. Бір-бірімізге жақсы көңіл-күй сыйладық деп үміттенемін, – деді ол.
Айта кетерлігі, осы жылы «Kazakhstan Kids Fashion Show-2016» Орталық Азиядағы ең үздік балаларға арналған шоу мәртебесіне ие болды.
Гүлдана ТАЛҒАТҚЫЗЫ