Астана
Елордадағы 45 қабатты «Зүбәржат квартал» (Б блогы) әкімшілік ғимараты gosreestr.kz электронды сауда алаңына шығарылды. Нысанды «ҚазМұнайГаз-Сервис» ЖШС саудаға салған. Жалпы ауданы 100 923,7 шаршы метрді құрайтын ғимараттың бастапқы бағасы – 24 миллиард 83 миллион 228 мың теңге.
Алматы
«Алматы Аренада» футзалдан студенттер арасындағы әлем чемпионаты ашылды. Турнирге 17 елден 25 команда қатысып отыр. Бұл жолы қатысушылардың саны 16 жылдың ішінде рекордтық межеге жеткен.
Ақмола облысы
Бурабайда 200 адамның қатысуымен «Colorfest Burabay» фестивалі өтті. «Burabayland» паркінің аумағында ұйымдастырылған шара барысында қатысушылар бір-бірінің үстіне бояу шашты.
Павлодар
Павлодар қаласының білім бөлімі мектептер үшін қазақ, орыс, сондай-ақ ағылшын тіліндегі 428 047 кітапты сатып алды. Жаңа форматтағы оқулықтар мен әдістемелік құралдардың электрондық нұсқалары да бар.
Қостанай облысы
Лисаков қаласында өткен «Тың Целина-2018» 33-ші облыстық спартакиадасына биыл 27 мыңнан астам адам қатысты.
Атырау
Атырауда 91 метрлік тутұғырдың құрылысы басталды. Ол Ә.Жангелдин-Құлманов көшелерінің қиылысында, көлемі 112 шаршы метр болатын жаңа алаңда орналасады. Бұл қаланың барлық жағынан көрінетін ең биік нысан болмақ.
Шығыс Қазақстан облысы
Келесі жылы Өскеменде және Ахмирово ауылында 1000 орындық мектептердің құрылыстары аяқталып, пайдалануға беріледі.
