АУДАН АРДАГЕРЛЕРІ АРДАҚТАЛДЫ
Биылғы Халықаралық қарттар күні мерекесі Сарыарқа аудандық ардагерлер кеңесінің 10 жылдық мерейтойымен тұспа-тұс келді. Осыған орай, аталмыш аудан әкімдігінде салтанатты шара өтті.
Бүгінгі таңда Сарыарқа ауданында 25 000 зейнеткер тіркелген. Олардың арасында 103-і Ұлы Отан соғысына қатысқан. Жалпы, аудандық ардагерлер кеңесінің жанында 124 бірлестік бар. Олар егде адамдардың бос уақыттарын тиімді өткізіп, түрлі қоғамдық шараларға қатысуына мұрындық болып келеді. Осылайша, аудандағы көп зейнеткер құрметті демалысқа шықса да, әлі де ел игілігі үшін еңбек етіп, жастарға үлгі-өнеге көрсетуде. Осы жөнінде кеңінен әңгімелей келе, аудандық ардагерлер кеңесінің төрағасы Әбенғаппас Ахметов атқарылып жатқан жұмыстар туралы баяндады. Оның айтуынша, аудан ардагерлері жыл сайын Астанада өткізілетін сенбіліктерге қатысып, елордамыздың гүлденіп-көркеюіне үлес қосумен бірге, айтулы мерекелерге орай ұйымдастырылатын мазмұнды да қызықты шараларға құрметті қонақ ретінде шақырылады. Сондай-ақ, Елбасының жыл сайынғы Қазақстан халқына арнаған Жолдауын талқылауға белсене атсалысады. Бұл тұрғыда қариялар жайы Президентіміздің дәстүрлі халыққа Жолдауында назардан тыс қалған емес.
Одан әрі Республикалық ардагерлер ұйымы орталық кеңесі төрағасының орынбасары Бекболат Мұқышев залда отырған әріптестеріне қарап: «Сіздерді егде адамдар деуге мүлде аузым бармайды. Өзімді құдды бір комсомолдар ұйымының кезекті отырысында отырғандай сезініп тұрмын» деді. Ал, қалалық ардагерлер кеңесінің төрағасы Амангелді Сыздықов зейнеткерлердің егде тартқандарына қарамастан, болашақ үшін, ел үшін аянбай еңбек етіп келе жатқанын, мемлекет те оларды қамқорлыққа алып, бар мүмкіндікті жасап отырғанын айта келе, сол үшін қала басшылығына алғысын жеткізді.
Сарыарқа ауданы ардагерлерінің кеңесі құрылған кезде қазіргі «Нұр Отан» партиясы Астана қалалық филиалы төрағасының бірінші орынбасары Сапар Ахметов сол ауданның әкімі болатын. Сондықтан да әу бастан осындағы барлық істердің басы-қасында болған ол кеңес жұмысына жақсы қанық екенін айта отырып, он жыл ішінде елордада атқарылған жұмыстар мен тәрбиелік іс-шараларға, әсіресе «Ардагерлерді ардақтайық» акциясының маңыздылығына тоқталды.
Бас қаладағы зейнеткерлер мен ардагерлерге көрсетіліп жатқан көмектер мен жеңілдіктер де жетерлік. Осы жөнінде әңгімелеген қалалық Жұмыспен қамту және әлеуметтік бағдарламалар басқармасы басшысының міндетін атқарушы Ләззат Әбуова жыл өткен сайын зейнеткерлер қатарының көбейіп келе жатқанын жеткізді. Оның айтуынша, 2007 жылы елорда зейнеткерлерінің саны 37 мың болса, 2012 жылы олардың қатары 52 мыңға жеткен. Ал, бүгінгі таңда Астанада 63 мың зейнеткер бар.
Сөз алғандардың барлығы да аудан зейнеткерлерін атаулы күнмен шын жүректен құттықтап, аудан әкімі Е.Бөлекпаевтың атына алғыстарын айтып, ардагерлерге ізгі тілектерін білдірді. Белсенді зейнеткерлер алғыс хаттармен марапатталып, аға буын өкілдерінің құрметіне «Астана-плаза» мейрамханасында дастарқан жайылды.
Гүлбаршын ӨКЕШҚЫЗЫ