Байқау жеңімпазы – ЕАГИ
Қазіргі заманның даму қарқыны оқытушылардың шығармашылығын жаңаша, ғылыми-зерттеу бағытында құруды талап етеді.
Елбасымыз Н.Ә. Назарбаевтың «Қазақстан – 2050» Қазақстан халқына жолдауында «Бәсекеге қабілетті дамыған мемлекет болу үшін біз сауаттылығы жоғары елге айналуымыз керек.
Біздің азаматтарымыз үнемі ең озық жабдықтармен және ең заманауи өндірістерде жұмыс жасау машығын меңгеруге дайын болуға тиіс. Сондай-ақ, балаларымыздың, жалпы барлық жеткіншек ұрпақтың функционалдық сауаттылығына да зор көңіл бөлу қажет» деп көрсетілген. Демек, бүгінгі ұрпақ жан-жақты дамыған әрі үнемі бәсекеге қабілетті болуы керек. Ол үшін жоғары оқу орындарында оқытушылардың оқыту әдістемелерін жаңғырту, студенттерге жаңа инновациялық технологиялық әдістерді қолдана отырып білім беру бүгінгі күннің өзекті мәселесі болуы тиіс.
Бүгінгі оқытушы ең озық білім беру жүйесін дамыту үшін жаңа идеяларға сай үнемі өзін-өзі жетілдіріп отыратын ғалым-педагог болуы шарт. Осыған орай Талдықорған қаласында І. Жансүгіров атындағы Жетісу мемлекеттік университетінде Қазақстан Республикасы Білім және ғылым министрлігі «Ұстаз» жоғары оқу орындары ассоциациясының ұйымдастыруымен Қазақстан Республикасы жоғары оқу орындарының жас ұстаздар арасында «ХХI ғасыр оқытушысы» атты республикалық байқауы өткізілді. Байқауға ұлттық, мемлекеттік жоғары оқу орындарынан 38 оқытушы қатысса, астаналық мемлекеттік емес жоғары оқу орны – Еуразия гуманитарлық институтынан 5 оқытушы кәсіби біліктілігін сынға салды.
Байқаудың мақсаты – жоғары оқу орындарында жаңа инновациялық және шығармашылық бағытта білім беретін оқытушыларды анықтай отырып, шеберлікті шыңдау. Сайыс екі күнге созылды. Бірінші кезеңде педагогика-психологиялық тест қабылданып, оқытушылардың білім-біліктіліктері анықталды. Сондай-ақ, оқытушылар өзін-өзі таныстыра отырып, педагогикалық әдістемелерімен қатар, сайыс шартына сай өздерінің сүйікті істерімен: домбыра тарту, ән салу, спорт түрлерімен айналысатынын көрсетіп, бүгінгі оқытушының жан-жақты кәсіби тұлға болу қажеттілігін айқындап берді.
Екінші кезеңде жас оқытушылар оқытудың жаңа технологиялық әдістері бойынша университет студенттеріне дәріс сабақтарын жүргізді. Дәрістер барысында оқытушылар өзара озық тәжірибелерімен бөлісіп, жоғары кәсіби біліктілігін көрсете алды. Байқау мәресінде қазылар алқасының шешімімен білім берудегі қолданған әдістерімен ерекшеленген оқытушылар марапатталды. Бірінші орынды әріптесіміз Еуразия гуманитарлық институтының түлегі, шетел тілдері кафедрасының аға оқытушысы Мақпал Қызырова иеленді. Қалған төртеуміз көрсеткен шеберліктеріміз үшін арнайы дипломдармен марапатталдық.
Жалпы, осы байқау еліміздегі білім берудің сапалық деңгейі қазіргі уақыт талабына сай жоғарылап келе жатқанын аңғартты. Аз күн ішінде көп көрдік, көп үйрендік. Енді сол алған тәжірибемізді астаналық әріптестерімізбен бөліссек дейміз.
Лаура ДӘУРЕНБЕКОВА,
Еуразия гуманитарлық институты қазақ және орыс филологиясы кафедрасының доценті, филология ғылымдарының кандидаты