Балаларға қамқорлық қажет
Жеделсөз
Римма Иманғазинова, Астана қалалық Балалар құқықтарын қорғау жөніндегі басқарма басшысы:
– Римма Асымқызы, департаменттің Балалар құқықтарын қорғау жөніндегі басқарма болып қайта құрылуына не түрткі болды?
– Еліміздегі мемлекеттік басқару жүйесін жетілдіру мақсатында, қала әкімдігінің 2013 жылғы 2 шілдедегі қаулысымен Астана қаласы Балалар құқықтарын қорғау жөніндегі басқармасы құрылды. Басқарма қызметі – баланың құқықтары мен бостандықтарын сақтау және қамтамасыз ету бойынша мемлекеттік саясатты іске асыру.
– Астанада кәмелетке толмаған қанша бала бар? Олардың әлеуметтік жағдайы қалай?
– 2013 жылғы 1 қаңтардағы мәлімет бойынша 214 047 кәмелетке толмаған бала бар. Оның ішінде білім беру мекемелерінде 376 жетім бала, 1 060 аз қамтылған отбасы балалары, көп балалы отбасынан шыққан 6 269 бала тіркелген. Бұл балалардың барлығына қолдау қажет. Қала әкімдігі тұрмысы төмен отбасыларға қамқорлық танытып келеді. Мәселен, олар мектепте тегін тамақтанады. Киім-кешек, жолақы билеттерімен қамтамасыз етілген. Бұл санаттағы балалар жазғы демалыс кезінде сауықтыру лагерьлерінде тегін демалады. Өмірде қиын жағдайға тап болған, шиеттей балалары бар отбасыларға түрлі қайырымдылық акциялары арқылы жәрдем көрсетіледі. Ал, кәмелетке толмағандарды бейімдеу орталығы 2011 жылдан бері жұмыс істейді. Ата-ананың қамқорлығынсыз қалған балаларды әлеуметтік-психологиялық қорғау мақсатында орталық жанынан «Отбасыларға қолдау көрсету» қызметі құрылды. Бүгінде орталықта 563 бала тәрбиеленуде.
– Алдағы жоспарларыңыз қандай?
– Өздеріңізге мәлім, «Мектепке жол» акциясы аясында 267 оқушыға 3 млн 390 мың теңгеге материалдық көмек көрсетілді. Акция кезінде көмекке мұқтаж балаларды анықтау мақсатында «Түнгі қаладағы балалар», «Саяжай», «Жасөспірім», «Каникул», «Бала еңбегі» және басқа да шұғыл алдын алу рейдтері жүргізілді. Астана қаласы әкімдігінің қолдауымен 24-30 тамыз аралығында Кәсіпкерлік және өнеркәсіп басқармасы арнайы жәрмеңке өткізетін болады. Онда балаларға арналған мектеп формасы мен оқу құралдары төмен бағамен сатылады. Сонымен қатар, «Арнаулы әлеуметтік қызмет көрсетудің үлгісін іске асыру үшін жасалатын бес қадам» жобасына сәйкес жұмысты одан әрі жалғастыру көзделуде. Жалпы, балалардың құқықтарын қорғау мәселесі бойынша 55-67-11, 55-67-05 байланыс телефондарына хабарласуға болады.
Гүлмира Аймағанбет