БЕЙБІТ КҮНДЕ ЕҢБЕК БӘСІ ЖОҒАРЫ
Елдігімізді нығайтуға бағдар берген Елбасының Жолдауын елорданың полицейлері де талқылап, ойларын ортаға салды.
Жолдау жүктеген міндеттерді жүзеге асыруға арналған жиынды Астана қаласы Ішкі істер департаментінің бастығы, полиция генерал-майоры Амантай Әубәкіров жүргізіп отырды. «Бұл – еліміздің әрі қарай даму бағытын айқындайтын басты құжат болғандықтан, ондағы әр тапсырманы орындау – қоғамға артылған жүк. Біз де жан-жақты, тұрақты дамуды көздеген стратегиялық құжаттағы белгіленген межелерге жетуге үлесімізді қосуымыз қажет» деді департамент бастығы. Амантай Акрамұлы Елбасы Жолдауында экономиканы, шағын және кәсіпкерлікті, көлік-жол құрылысын дамытумен қоса, бейбітшілік пен тұрақтылықты сақтау, патриотизмді дамыту мәселесіне қатысты да көптеген жайттар айтылғанын атап өтті. «Мемлекет басшысының «Отанды сүю – бабалардан мирас болған ұлы мұраны қадірлеу, оны көздің қарашығындай сақтау, өз үлесіңді қосып, дамыту және кейінгі ұрпаққа аманат етіп, табыстау деген сөз. Барша қазақстандықтардың жұмысының түпкі мәні – осы!» дегенінде үлкен мән жатыр. Елордалық полицейлер қоғамның қауіпсіздігі мен бірлігін қамтамасыз етуде сақадай сай болуы тиіс. Біз Елбасы атап өткендей, бейбітшілікті күн сайынғы еңбегімізбен қорғауымыз керек» деді Амантай Әубәкіров.
Жиында Астана қаласы Ішкі істер департаментінің Ардагерлер Кеңесінің төрағасы Есім Танабергенов те көпшілік атынан Жолдауға қатысты пікірін білдірді. «Ұлт көшбасшымыз Нұрсұлтан Әбішұлы Назарбаевтың біздің алдымызға қойып отырған міндеттері жылдан-жылға артып келеді. Сондықтан еліміздің тәуелсіздігін нығайту жолында халықтың және сіз бен біздің істеп жатқан еңбектеріміздің барлығы мемлекетіміздің нығаюы, тәуелсіздіктің тұғырлылығы, халықтың әл-ауқатының артуы үшін жасалуда. Осы жолда бәріміз елдің бізге деген сенімін ақтап, мақсаттарға жетеміз деп мен нық сенемін» деді ол.
Қымбат НҰРҒАЛИ