Достық додасы
«Global Silk Road» Жібек жолы бойындағы қалалар мэрлерінің форумының қорытындысы іспеттес Астанада футболдан Жібек жолы кубогы өтті.
Жолдастық кездесуде мэрлер құрама командасы мен халықаралық Ислам іскерлік қауымдастығының құрама командасы кездесті. Жібек жолы кубогының ашылу салтанатында сөз сөйлеген елорда әкімі Әсет Исекешев жиналған команда мүшелеріне қошемет көрсетіп, сәттілік тіледі:
– Баршаңызды Астана қаласының 20 жылдық мерейтойымен шын жүректен құттықтаймын. Жібек жолы бойындағы қалалар мэрлерінің форумы аясында көптеген шаралар өтті. Ал бұл спорт мерекесі форумның әдемі қорытындысы деген ойдамын. Ойын сәтті өтсін. Баршаңызға жеңіс тілеймін!
Ойын алдында Қазақстан Республикасының Мемлекеттік әнұраны тыңдалды. Ал Әсет Исекешевке Ислам іскерлік қауымдастығының құрама командасы атынан команда капитаны, танымал футбол жұлдызы Вагиз Хидиятуллин доп сыйлады. Бұл құрама сапында Руслан Нигматуллин, Андрей Канчельскис, Ринат Дасаев секілді футбол жұлдыздары доп тепті.
– Қала әкімдігінің ұйымдастыруымен Жібек жолы кубогы болып жатыр. Қос құрама жарысқа дайын. Мэрлер құрама командасы сапында елорда әкімдігінің қызметкерлері де ойнайды. Жалпы, әкімдік қоғамдық спортты дамытуға көп көңіл бөлуде. Мұндай шараларға қала әкімі өзі бас болып, әкімдік қызметкерлері қашанда қолдау көрсетеді, – деді «Астана су арнасы» МКК бас директоры Зейнулқабден Табиғат.
Әр команда 20 ойыншыдан құралды. Футболшылар 20 минуттан тұратын екі тайм ойнады, арасында 5 минут демалыс берілді. Ал ойыншы алмастыру еркін түрде жүрді. Жолдастық кездесудің аты затына сай болып, ойын тең аяқталды. Есеп – 2:2. Қос құрама мүшелеріне бүгінгі футбол мерекесінен естелік ретінде сыйлықтар берілді.
Бексаттар САТТАР