Мәскеудегі мерейлі сәт
Астананың 20 жылдық мерейтойы қарсаңында Мәскеудегі халық шаруашылығы жетістіктері көрмесі алаңында «Қазақстан» тарихи павильонының ресми ашылуы болды. Оған Премьер-министрдің бірінші орынбасары Асқар Мамин, Ресей үкіметі төрағасының бірінші орынбасары Антон Силуанов және Қазақстанның Ресейдегі елшісі Иманғали Тасмағамбетов қатысып, толығымен жаңартылған павильонды аралап көрді.
Қазақстандық делегацияны бастап барған Асқар Мамин барлық жиналған қауымды ел Үкіметі атынан құттықтап, ізгі лебізін білдірді.
– Мәскеу секілді бауырлас мемлекеттің төрінде Астана қаласының 20 жылдығы аясындағы көрменің ашылуы – сыйластықтың нышаны. Ресей – Қазақстанның стратегиялық серіктесі. Екі ел арасындағы экономикалық қарым-қатынас серпінді дамуда және еуразиялық кеңістіктегі ықпалдастық үдерісі күннен-күнге нығая түсуде. Бұл қатынас – екі мемлекет арасындағы қатынастың қалай дамуы керектігін көрсететін XXI ғасыр үлгісі, – деді ол.
Асқар Ұзақбайұлының айтуынша, елорданы дамытуға 50 млрд доллар көлемінде инвестиция тартылған. Оның 80 пайызы жеке инвесторлардан түскен. Астана шағын және орта бизнестің символына айналды. Қала экономикасының елу пайызын шағын және орта бизнес құрайды. Жиырма жылда Астана тұрғындары 1 миллион 200 мыңға жетіп, ірі мегаполиске айналды. Тұрғын үй құрылысы ірі қарқынмен жүргізіліп, тұрғын үй-коммуналдық шаруашылығы жаңғыртылды.
Премьер-министрдің бірінші орынбасары Ресей президенті В.Путиннің Астананы «қазіргі әлемдегі ғажайыптардың бірі» деп бағалағандығын атап өтті. Өз кезегінде Ресей үкіметі төрағасының бірінші орынбасары Антон Силуанов бүгінде Астананың ірі іскерлік орталығына айналғандығын айтты. Енді жаңа павильон еліміздің экономикалық әлеуеті мен бай тарихи мұрамызды таныстыру рәсімдері өтетін алаңға айналмақ. Сондай-ақ, Ресейдің бас қаласында елорданың 20 жылдығын мерекелеу аясында Астананың сәулеті мен құрылысына арналған конференция ұйымдастырылды.