ЕУРАЗИЯЛЫҚ ОДАҚ ТАҚЫРЫБЫ ТАЛҚЫЛАНДЫ
Л. Гумилев атындағы Еуразия ұлттық университетінде «Нұр Отан» партиясы Төрағасының бірінші орынбасары Бауыржан Байбектің профессорлық-оқытушылық құраммен және студенттермен кездесуі өтті.
Кездесу барысында Еуразиялық экономикалық одақ құру мәселесі мен жаңа ықпалдастық бірлестігі шеңберінде Қазақстанды одан әрі өркендетудің келешегі талқыланды.
Өз дәрісінде Бауыржан Байбек Еуразиялық экономикалық одаққа қатысудан қарапайым қазақстандықтарға тиетін пайда туралы айта келіп, азаматтар тұтынатын өнім мен қызмет көрсету сапасы, бәсекелестік есебінен олардың бағаларының арзандауы, жаңа жұмыс орындарын құру, адам капиталы қозғалысының еркіндігі сияқты экономикалық ықпалдастықтың артықшылықтарына жеке-жеке тоқталды.
Шараға қатысқан Ұлттық кәсіпкерлер палатасы басқарма төрағасының бірінші орынбасары Рахым Ошақбаев өз сөзінде: «Еуразиялық Экономикалық Одақ шеңберінде үш ел бизнес жүргізу үшін, ең қолайлы жағдайлар жасау үшін, ең жақсы орта климаты үшін адал бәсекеге түседі. Мұнда Қазақстан сөзсіз көшбасшы болып табылады. Кәсіпкерлік қызмет субъектілерін тарту үшін біздің осы бәсекеде жеңіп шығуымызға барлық мүмкіндіктер бар» деді.
«Нұр Отан» партиясының көшбасшысы Нұрсұлтан Назарбаевтың тапсырмасы бойынша еуразиялық ықпалдастықтың маңызды қырларын түсіндіру мақсатында студенттік активтермен және оқытушылармен осындай кездесулер еліміздің барлық өңірлерінде өткенін атап кеткен жөн.