Біздің еліміз үшін биылғы жылдың ықпалды оқиғаларының бірі – G-GLOBAL идеясы. Жаңа ақылдастық алаңында Президент Нұрсұлтан Назарбаев Қазақстанды жаһандық саясаттың белсенді қатысушысы ретінде танытты.
Қазақстанның Еуропадағы Қауіпсіздік және Ынтымақтастық Ұйымына табысты төрағалық етуі және G-global әлемінің тұжырымдамасын ұсынуы аймақтық мәселелерге ғана емес, адамзаттық түйткілдердің түйінін тарқатуға қауқарымыз жететіндігін дәлелдеді. Қазақстан батыс пен шығыс елдерінің стратегиялық әріптесі ретінде өркениетті қауымдастықтың маңызды нысанына айналды. Бұл жолда биік мақсаттар қойған елімізде экономикалық және саяси табыстар еселенді десек артық айтқанымыз емес. Мұның бәрі –көпвекторлы саясат ұстанып келе жатқан Елбасының тікелей еңбегінің нәтижесі.
Тұрақтылық таңдауы
Қазақстан энергетикалық тасымал дәлізінің бойында орналасқан. Қойнауымыз мұнай мен газға аса бай. Бұл туралы әлемге танымал сарапшылардың бірі, бейбітшілік саласындағы Нобель сыйлығының иегері Генри Киссинджер «Қазақстан үлкен өркениеттердің түйіскен жерінде орналасқан, әрі әлемдік нарыққа көмірсутегі өнімдерін беретін аса ірі мемлекет» деп айтқан болатын. Алайда, Қазақстан әлем елдеріне тек өндіріп отырған ураны мен мұнайы арқылы маңызды дейтін пікірді ұстанатындар қателеседі. Өйткені, Қазақстанда ең алдымен тұрақтылық пен тыныштық салтанат құрған. Яғни, Елбасы Нұрсұлтан Назарбаевтың жүзеге асырып отырған саяси жүйесі демократиялық құндылықтармен, саяси-құқықтық тетіктерімен ерекшеленеді. Бұл өз кезегінде әлем қауымдастығының алдында құрмет пен сенімді арттыра бермек.
Президент бастамасымен қолға алынған, жаһандық мәселелерге деген көзқарастар мен оларды шешудің сан жолдарын қарастыратын G-global жобасы айқын мақсатқа негізделгені де осыдан. Күллі әлем елдерімен келісілген, жаһандық деңгейде жаңғырту үрдісін қолға алу керектігін ұлт көшбасшысы дәлелдеді.
Жаһан дамуындағы жаңа серпін
Мемлекет басшысының мәлім-деуінше, G-global идеясының әлеуеті әлемдік қоғамдастықтың кеңінен қолдауы арқасында арта түсті. G-global сұхбат алаңы –әлемдік қаржы дағдарысынан шығу тетіктерін құру және талқылауға бағытталған халықаралық виртуалды жоба. Бұл арқылы барлық мемлекеттерді, әлемдік саясаттың мемлекетаралық және үкіметтік емес субъектілерін, сондай-ақ, жекелеген саясаткерлерді, қоғам қайраткерлерін, сарапшылар мен ғалымдарды ынтымақтасуға шақыру. Бүгінде сұхбат алаңы мамандардың айтуынша, 150 елдегі жүз мыңдаған пайдаланушылардың басын қосқан. «Еуразиялық экономикалық ғалымдар клубы» қауымдастығының мәліметіне сенсек, аталмыш сайтты жыл сайын он мың адам пайдаланады екен. Осылайша экономикалық және сараптамалық сайттар рейтингісінде Давостық кездесулердің интернет-ресурсынан кейінгі екінші орында тұр. Ал, іздеу индексі бойынша барлық экономикалық форумдарды басып озғаны елді қуантады. Биылғы жылы Астана қаласында өткен форумда Елбасы адамзат өркениеті дамуының конструктивизмі бес қағида негізінде қамтамасыз етілсе, оны G-Global қағидалары деп атауды ұсынды. Оның айтуынша, адамзат революциялар мен әлемдік соғыстардың лимитін өткен ғасырда сарқыды. «XXI ғасырда ғаламдық сәулетті табысты жаңарту тек қана ілгері даму – эволюциялық жолмен ғана іске асырылуы мүмкін. Араб көктемі көрсеткендей, революциялар тек қоғамның дамуын тежейді, олардың экономикасын кері апарып тастайды, көптеген проблемалар тудырады» деген болатын.
G-global –кез келген интернет пайдаланушының түрлі зияткерлік жұмыстарға, атап айтқанда сараптамалық шолуларға, пікірталастарға, бизнес жобалар мен сауалнамаларға қатысуына мүмкіндік беретін жаңа формат ретінде әйгіленді. Ол – ұлттық экономиканың дамуына, әлемдік экономиканың реформалануы-на, қала берді жаһандық деңгейдегі дағдарысқа қарсы күрес тетіктерінің жасалуына қызығушылық білдіретін, барлық әлеуметтік топ өкілдеріне арналған әмбебап жоба. Ал іс жүзінде жұмыс алаңы ретінде Астана экономикалық форумында танылды. Содан бері Астана қаласы барша әлем қауымдастығының алдында беделді жаһандық ақылдастық алаңына айналып келеді.
Бесінші Астана Экономикалық форумында Президент Нұрсұлтан Назарбаев ұсынған G-global-дың бес қағидасы: эволюция; әділдік, теңдік, мәміле; жаһандық толеранттық пен сенім; жаһандық транспаренттілік пен ашықтық және конструктивті көпполярлылық қағидалары әлем өкілдерінің назарын өзіне аудартты. Жобаны қолдағандар қатарында Нобель сыйлығының лауреаттары – Роберт Манделл, Джон Нэш, Роберт Корнберг, Эрик Маскин, Джон Ауманн, Финн Кидланд, Джеймс Миррлис, халықаралық бизнес және білім, ғылым ұйымдарының басқа да ірі өкілдері бар.
