15-26 наурыз аралығында Үндістан астанасы – Нью-Дели қаласында шаршы алаңда бокстың үздіктері анықталды.
Әлем чемпионатында астаналықтар Римма Волосенко 60 келі салмақта сынға түссе, Ләззат Күнгейбаева 81 келіде жоғары салмақта өнер көрсетті. Біз қос жерлестің жарыс жолын жіті қадағалап отырдық.
Сонымен, Волосенконың алғашқы қарсыласы Азияның екі дүркін чемпионы өзбекстандық Ситора Тұрдыбекова болды. Жекпе-жек тартысты өрбіп, алма-кезек шабуылға ұласты. Римма қарсыласына қарағанда белсенді болып, 4:3 есебімен жеңіске жетті. Келесі айналымда Сербия өкілі Наталья Шадринаны ұтты. Алайда ширек финалда қытайлық Вэнлу Янмен кездесіп, есе жіберіп, жүлдесіз қалды.
Ал Ләззат Күнгейбаева рингте өзіне сенімді болып, қарсыластарынан айласын асырды. Ол жартылай финалда Әзербайжан боксшысы Айнур Рзаевамен қолғап түйістіріп, басым түсті. Финалда Марокко өкілі Марди
Хадиджамен кездесіп, төрешілердің шешімімен есе жіберді. Сөйтіп, әлем чемпионатының күміс жүлдегері атанды.
Ләззат Күнгейбаева 2014 жылғы Кореяның Чеджу қаласында өткен әлем чемпионатында екінші, 2016 жылы Астана қаласында байрағы көтерілген әлем чемпионатында бірінші орын алған еді.
Нью-Дели рингінде 57 келі салмақта Карина Ибрагимова екінші орын алса, Алуа Балкибекова (48 келіге дейін), Надежда Рябец (66 келіге дейін), Валентина Хальзова (75 келіге дейін) және Фариза Шолтай (81 келіге дейін) үшінші орыннан көрінді. Осылайша Қазақстан ұлттық құрамасы 6 медаль жиынтығымен жалпыкомандалық есепте 8-орынға тұрақтады.
