Aŋqaulardyŋ auzyn aŋqityp ketetın alaiaqtar köbeidı. Endı olar äleumettık jelılerdıŋ mümkındıgın paidalanyp, oŋai jolmen aqşa tauyp jür.
Juyrda astanalyq poliseiler ǧalamtorda alaiaqtyqpen ainalysty degen küdıkpen 23 jastaǧy Taraz qalasynyŋ tūrǧynyn tūtqyndady. Iz kesuşılerdıŋ tüsındırgenındei, alaiaq qyz Instagram-da akkaunt aşyp, terı tondar men terı būiymdaryn satatyny jönınde aqparat berıp otyrǧan. Jūrttyŋ nazaryn özıne audaru üşın terı tondardyŋ baǧasyn naryqtaǧydan arzanǧa jarnamalaǧan.
Kün suytqanda näzık jandylardyŋ terı tondarǧa esı ketetının eskergen alaiaq qyz neşe türlı ädemı tondar kigen qyzdardyŋ suretterın berıp, tıptı sauda üilerınıŋ mekenjailaryna deiın körsetıptı. Qulyǧyna qūryq boilatpaǧany sonşalyq, özınıŋ dauysyn el tanyp qoimas üşın «klientterımen» WhatsApp arqyly hat jazysqan. Öz önımderın satyp aluşylardy qyzyqtyra otyryp, tondardy üiıne jetkızıp beretınıne uäde etedı. Al tauardyŋ 100 paiyz aqşasyn aldyn ala Qiwi-ämiianǧa audarudy ötınedı.
Al endeşe! Ömırde körıp-bılmegen adamnyŋ aitqanyna sengender 100-den 300 myŋ teŋgege deiıngı aqşasyn alaiaqtyŋ şottaryna audaryp jıberıptı. Söitıp ol ai men künnıŋ amanynda elordanyŋ 7 tūrǧynyn aldap, 1,5 mln teŋgenı qaltasyna basqan. «Is bıttı, qu kettı» degendei, aram aqşany şytyrlatyp sanap alǧan soŋ, nömırın būǧattap, akkaunttaryn jauyp, taiyp tūrady. Alaida alaiaqtyŋ aram oiy ıske aspady. Qyraǧy qūqyq qorǧauşylar onyŋ ızıne tüsıp, qolyna kısen saldy. Qazırgı kezde küdıktıge qatysty QR Qylmystyq kodeksınıŋ 190-baby (alaiaqtyq) boiynşa sotqa deiıngı tergeu amaldary jürgızılıp jatyr.
Ötken aptada «kaspi.kz»-ke qatysty şyqqan şu da jūrtty dürlıktırdı. WhatsApp-tan: «Bank basşysy Mihail Lomtadze salymşylardyŋ qarjysyn alyp, şetelge qaşyp kettı» degen aqparat taratyldy. Mūndai ösek-aiaŋnyŋ şyǧuyna 1 qaraşada «kaspi.kz» mobildık qosymşasyndaǧy tehnikalyq aqau sebep bolǧan edı. Tıptı BAQ basşylaryna da qūpiia hattar jıberıldı. Alaida jalǧan aqparatty banktıŋ basqarma töraǧasy Mihail Lomtadzenıŋ özı joqqa şyǧardy. «Mūndai habarlama bızge de keldı. Menı Qazaqstannan qaşyp kettı dep jazypty. Bıraq men eldemın, öz keŋsemde otyryp, jūmys ısteudemın. 16 qaraşadaǧy jalpyhalyqtyq ««kaspi ūjymy» merekesıne daiyndyq jasap jatyrmyz» dedı ol respublikalyq arnalardyŋ bırıne bergen sūhbatynda.
