Äleumetke beiımdeidı
Jasyratyny joq, bügıngı taŋda taǧdyr tauqymetıne tüsıp, ömırdıŋ qiyn jaǧdaiyna duşar bolǧan jandar az emes. Astana qalasy äkımdıgınıŋ «Ömırlık qiyn jaǧdaida qalǧan adamdardy äleumetke qosu ortalyǧy» kommunaldyq memlekettık mekemesı belgılı tūraǧy joq adamdarǧa kömek körsetıp keledı.
Mekemenıŋ äleumettık patrul qyzmetı kündelıktı qala ışınde reid jürgızıp tūrady. Arnaiy kestege säikes belgılengen baǧdar boiynşa künbe-kün, ertelı-keş qala aralap, qinalyp jürgen jandardy anyqtap, olardy öz kelısımderımen ortalyqqa jetkızıp otyrady.
Jaqynda kezektı reidke şyqqan äleumettık qyzmetkerlerı taŋǧy saǧat toǧyzdar şamasynda «Astanalyq bazar» maŋynan türlerı solǧyn, jabyrqau jürgen qyryq bes-eluler şamasyndaǧy ekı azamatty baiqaidy. Ūtqyr äleumettık patrul qyzmetkerlerı olarǧa jaqyndap, jön sūrastyrǧanda, özderı boljaǧandai, olardyŋ baspanalary joq azamattar ekenı belgılı bolady. Ekeuı de Astanaǧa jūmys ızdep kelgen körınedı.
Ortalyqtyŋ äleumettık qyzmetkerı Nūrtas Rahmetullaev būlarǧa män-jaidy tüsındırıp, mekemenıŋ qyzmetımen tanystyryp, qoldaryna anyqtamalyq bukletterdı ūsynady. Aiaq astynan özderıne degen mūndai qaiyrymdylyq pen qamqorlyqty kütpegen azamattar säl abyrjyp qalsa da, sälden keiın sözge kelmesten ortalyqqa baruǧa kelısımderın beredı.
Osyndai jaǧdaidaǧy adamdar «Älem» bazarynyŋ maŋynan da kezdesedı. Būlarmen de mekeme qyzmetkerlerı äŋgımelesedı. Söitıp baspanasyz jürgen taǧy 4 azamat özderıne ūsynylǧan jaǧdaidan bas tartpai, qyzmet aluǧa kelısımderın berıp, ortalyqqa jetkızıledı. Olardyŋ barlyǧy da qol-aiaqtary sau, 35-55 aralyǧyndaǧy azamattar bola tūrsa da, ne üilerı, ne jūmystary joq tūlǧalar bolyp şyqty.
«Kündelıktı reidter kezınde baspanasyz, jūmyssyz adamdardy jinap, ortalyqqa tapsyryp otyramyz. Ärine, ärbır adam öz taǧdyryna özı ie ǧoi. Eger erınbei-talmai, ızdenıp talaptansa kez kelgen adamnyŋ ekı qolyna bır jūmys tabylady dep oilaimyz. Degenmen, bız eşqaşanda qarausyz qaldyra almaimyz. Olarǧa jön körsetu, äleumetke qosu – bızdıŋ mındetımız. Qyzmet aluşylardyŋ arasyndaǧy keibırı – türlı taǧdyr tauqymetıne tüskender, tuystarynyŋ qarauynsyz qalǧandar, mügedekter bızdıŋ mekemenı özderı tauyp kelgender. Bız öz tarapymyzdan olardy dūrys ömırge beiımdeuge tyrysamyz» deidı ūtqyr äleumettık patrul qyzmetınıŋ jetekşısı, tüngı keluşıler bölımınıŋ basşysy Jaidar Şalǧynbaev.
Nūrbek JAQANOV,
jurnalist