Keşe «Astana Opera» teatrynda Ūly Jeŋıstıŋ 70 jyldyq torqaly toiy men daŋqty kompozitor Petr Chaikovskiidıŋ tuǧanyna 175 jyl toluyna orai ädeiılep Reseiden at arytyp kelgen, önerın älem jūrty moiyndaǧan körnektı dirijer Valerii Gergiev, pianist Denis Masuev jäne Mariia teatrynyŋ simfoniialyq orkestrı müşelerınıŋ qatysuymen jyly şuaqqa toly gala-konsert öttı.
Arqaǧa keş keletın körkem köktemnıŋ adam jan düniesın jelpıp ötetın «altynkürek» samalyndai lebı bar äserge toly keşte osymen üşınşı märte ötıp otyrǧan jas pianinoşylardyŋ III «Astana Piano Passion» halyqaralyq festivalı de saltanatty türde aşyldy. Jalpy, teatr sahnasynda ekı daryndy önerpaz ben halyqaralyq baiqaudyŋ bır arnada toǧysyp ötkenı, bylaişa aitqanda, aldyn ala eş jobalanbaǧan, bır künge barlyǧy toqailasqan sättı şara boldy. Reseidıŋ halyq ärtısı Denis Masuevtıŋ özı Chaikovskiidıŋ orkestrmen fortepianoǧa arnalǧan jürektıŋ näzık qylyn şertetın klassikalyq şyǧarmalaryn joǧarǧy därejede oryndady. Al Mariia teatrynyŋ simfoniialyq orkestrınıŋ muzykanttary men maestro Valerii Gergievtıŋ şeberlıgı men talantyna täntı bolmaǧan jan kemde-kem şyǧar.
Jalpy, mädeni şara bastalmas būryn jurnalister qauymymen tıldesken baspasöz mäslihatynda alystan kelgen qonaqtardyŋ bızdıŋ elımız turaly, onyŋ önerı jaiynda aitqan äŋgımelerı de äserlı. Mäselen, Valerii Gergievtıŋ aitqan sözderı taǧylymdy oiǧa toly boldy.
– Men qazaq elıne osymen altynşy ret kelıp tūrmyn. Qazaq jūrty – qonaqjai, darhan,
daryndy tūlǧalarǧa bai halyq. Men osy elge kelgende öz üiımde jürgendei sezınem. Qazaqstanǧa alǧaş osydan otyz jyl būryn kelgen edım. Ol kezde jas dirijermın. Tıptı, sol kezde Dınmūhamed Qonaevtyŋ özı jylyşyrai bıldırgen. Sondai-aq, Elbasy Nūrsūltan Nazarbaev ta menı jaqsy tanidy. Osy bır-ekı künnen keiın elderıŋızde tarihi uaqiǧa ötpek. Barlyq halyq osy sättı asyǧa kütıp otyrǧanyn tüsınemın. Qazaq elımen bızdıŋ önerdegı bailanysymyz eşqaşan üzılmeidı, qaita üdei beredı, – dedı körnektı dirijer.
Odan keiın söz alǧan joǧaryda aityp ötken halyqaralyq festivaldıŋ joba jetekşısı D. Masuev baiqau turaly qysqaşa aityp öttı.
– Osymen üşınşı ret ötkelı otyrǧan baiqauǧa älemnıŋ 45 elınen 400-ge juyq ötınış tüstı. Jyl saiyn qatysuǧa ümıtkerler sany köbeiıp keledı. Būl festivaldıŋ halyqaralyq brendke ainalyp kele jatqandyǧyn körsetedı. Atalǧan joba äuelden-aq erekşelıgımen älemdık ondyqqa eş kedergısız enıp ketedı. Sondyqtan, baiqaudyŋ jüldelık qory, ötkızu erejelerınıŋ özı basqa öner saiystarynan joǧary, – dedı joba jetekşısı. Baspasöz jiynyn jürgızgen «Astana Opera» teatrynyŋ direktory Töleubek Älpievtıŋ özı osyndai barlyq elge tanylǧan aituly tūlǧalardyŋ kelıp, öner körsetuı teatr üşın ǧana emes, elorda tūrǧyndary üşın ülken mereke ekenın jetkızdı. Sonymen, şymyldyǧy türılgen III «Astana Piano Passion» halyqaralyq festivalı 30 säuırge deiın sozylmaq.
Azamat ESENJOL
