AUYL – BIZDIŊ ASYRAUŞYMYZ
Samat Eskendırov,
Soltüstık Qazaqstan oblysynyŋ äkımı:Qazaq ruhaniiatyna Maǧjandy, Säbittı, Ǧabittı bergen öŋırdıŋ bügıngı tırşılık-tynysy qandai? Terıskei halqyn osy künderı ne alaŋdatady? Keşe Ortalyq kommunikasiialar qyzmetınıŋ brifingıne jinalǧan qauymdy Soltüstık Qazaqstan oblysynyŋ äkımı Samat Eskendırov osy jaǧynan qanyqtyrdy. Aldymen aimaqtaǧy problemalyq mäselelerdıŋ şetın şyǧarǧan ol auyldyq jerlerde jasalyp jatqan jūmystarǧa toqtaldy.
«Men auylda tuyp-östım. Sondyqtan auyl ömırın bır kısıdei bılemın. Şynymdy aitsam, auylda ömır sürıp, öz ūiasy – atamekenı azyp-tozyp, qūryp ketpeuı üşın eŋbek etıp jürgen adamdardy airyqşa qūrmetteimın. Olar jer baptaidy. Al, Jer-Ana – bızdıŋ asyrauşymyz. Auyl adamdary jaqsy ömır süru üşın qoldan kelgenımızdıŋ bärın ısteuımız kerek. Eŋ aldymen oblystaǧy eldımekenderdı auyz sumen qamtamasyz etu jäne tozyǧy jetken joldardy jöndeuımız qajet. Su men jol – bızdıŋ basty problemalarymyz» degen öŋır basşysy ärı qarai «Aqbūlaq» baǧdarlamasy boiynşa atqarylǧan jūmystarmen tanystyrdy. Jergılıktı joldardy jöndeuge biyl 5 mlrd 400 mln teŋge bölıngenın, būl byltyrǧymen salystyrǧanda ekı ese köptıgın aitty. Respublikalyq maŋyzy bar joldardyŋ jaǧdaiyna toqtalyp, kelesı jyly Astana – Petropavl tas joly qaita jöndeletının jetkızdı.
Oqyrmandardyŋ esınde bolsa, elımızdegı medisina mamandarynyŋ tapşylyǧy turaly bırneşe ret jazdyq. Soltüstık Qazaqstan oblysynda da mūndai tüitkıl bar. Aimaqtyŋ densaulyq saqtau salasynyŋ ahualymen tanystyrǧan S.Eskendırovtıŋ sözınen oblysqa 224 därıger qajettıgın, sonyŋ ışınde öŋır halqynyŋ 60 paiyzy auyldarda tūratyn bolsa, sol jerlerge 84 medisina mamany kerektıgın bıldık. Degenmen, tapşylyqty azaitu jūmystary jürgızılude eken. Mäselen, «Diplommen auylǧa» baǧdarlamasymen oblys auyldaryna biyl 45 jas därıger barǧan.
Kelesı jyly Petropavl qalasynda «Nazarbaev ziiatkerlık mektebınıŋ» aşyluy josparlanuda.
«Oblystyŋ dihandary aua-raiynyŋ qolaisyzdyǧyna qaramastan är gektardan 14,6 sentnerden önım alyp, 5 mln tonnadan astam astyq jinady» degen S.Eskendırov auyl şaruaşylyǧy salasyndaǧy jūmystarǧa da toqtaldy.
Üdemelı industrialdy-innovasiialyq damu baǧdarlamasyna öŋırdıŋ 30 jobasy engızılgen. Olardyŋ 26-sy jüzege asyrylǧan.
Şoqan Uälihanovtyŋ äjesı – Aiǧanymnyŋ qonysy men Abylaidyŋ aq üiı qalpyna keltırılgenın aitqan Samat Eskendırov öz sözın turizm salasyndaǧy josparlarmen aiaqtady.
Amanǧali ŞMİTŪLY