Elordada jeke tūrǧyn üi sektorynda örttıŋ aldyn alu maqsatynda jyl saiyn türlı aksiia ūiymdastyrylyp tūrady. Qaraşanyŋ 2-sı künı bas qalada «Qauıpsız janūia» auqymdy ıs-şarasy bastaldy.
Qalalyq Tötenşe jaǧdailar departamentınıŋ ūiymdastyruymen ötıp jatqan aksiia Bögenbai batyr daŋǧyly, 4 mekenjaiynda ornalasqan №5 mamandandyrylǧan ört söndıru bölımınde jeke qūramnyŋ sap tüzeuımen bastaldy. Sodan soŋ Astana qalasy Memlekettık ört baqylau basqarmasy bastyǧynyŋ orynbasary Ajar Rüstemova jeke tūrǧyn üi sektorynda örttıŋ aldyn aluǧa baǧyttalǧan ügıt-profilaktika jūmystarynyŋ tūraqty negızde jürgızılıp tūratynyn jetkızdı. Aituynşa, aǧymdaǧy jyldyŋ basynan berı Astana qalasy boiynşa jeke üilerde 159 ört boldy, sonyŋ saldarynan 3 adam qaza tauyp, 22 adam jaraqat alǧan.
– Tūrǧyn üi sektorlaryndaǧy örttıŋ negızgı sebepterı peşpen jylytu, elektr jabdyqtaryn qoldanu kezınde ört qauıpsızdıgı talaptarynyŋ saqtalmauy jäne t. b. köptegen salǧyrttyqtan bolyp jatady. Osyǧan bailanysty 2023 jylǧy 2 qaraşadan bastap 5 qaraşaǧa deiıngı aralyqta jeke tūrǧyn üi sektorynda ört qauıpsızdıgın qamtamasyz etu boiynşa «Qauıpsız janūia» auqymdy aksiiasy ötude. Oǧan qūtqaruşylar, erıktıler, poliseiler, jergılıktı atqaruşy organnyŋ jäne äleumettık qorǧaudyŋ ökılderı qatysyp, ıs-şara barysynda qala tūrǧyndaryna ört kezındegı qimyl-äreketter, elektr jelılerı men aspaptardy, jylytu jüielerın qoldanu, ört qauıpsızdıgı erejelerınıŋ būzyluyn anyqtau, uly gaz datchikterın ornatu boiynşa tüsındıru-aldyn alu jūmysy jürgızılıp jatyr, – dedı A.Rüstemova.
Jyl saiyn jylytu mausymy kezınde adamdardyŋ örtten qaitys boluy men jaraqattanuy oryn alady. Mamandardyŋ mälımdeuınşe, mūnyŋ bärıne sebep – salǧyrttyq. Aksiiany ūiymdastyrudaǧy basty maqsat osyndai keleŋsızdıkter men oqys oqiǧalardyŋ aldyn alu eken. Būl rette basqarma qyzmetkerlerı jekemenşık tūrǧyn üilerdı aralau arqyly jylytu jüielerındegı, elektr jelılerı jäne jabdyqtar boiynşa kemşılıkterdı tekserıp, tılsız jaudyŋ aldyn alu ıs-şaralaryn jürgızu üşın halyqtyŋ äleumettık osal toptary tūratyn mekenjailarǧa reidke şyqty.
Qalalyq TJD basqarmasynyŋ Almaty audany boiynşa bas injenerı Saǧyntai Qadyrbekovtıŋ aituynşa, biyl äleumettık osal topqa jatatyn 200 otbasydan ötınış tüsken. Aksiia barysynda, peşter men mūrjalardy, elektr jylytqyşynyŋ dūrys ornatyluyna basty nazar audara otyryp, mamandar jylytu qūralynyŋ ainalasyndaǧy jaryqty bıteu keregın, onyŋ aldyna mındettı türde metall qaŋyltyr qoiyp, qūbyrdy üş aida bır ret tazalap tūrudyŋ qajettıgın eskerttı. Sodan soŋ ört qauıpsızdıgı ailyǧynyŋ aiasynda elordalyq tūrǧyndardyŋ üiıne jylytu mausymy kezınde iıs tiıp qalmas üşın uly gazdy anyqtaityn dabyl qondyrǧysyn tegın ornatyp berdı. Bügınde Almaty audany äkımdıgımen bölıngen 100 datchiktıŋ 62-sı äleumettık osal toptardyŋ üiıne ornatyldy.
Ötken peş jaǧu mausymynda jeke tūrǧan 110 üiden ört şyqqan bolatyn. Degenmen būl körsetkış byltyrǧymen salystyrǧanda 23 paiyzǧa kem. Jalpy Astana qalasy boiynşa barlyǧy 935 tūrǧyn üi esepte tūr jäne de jataqhana men kommersiialyq qyzmet retınde qaita jasalǧan 1162 tūrǧyn üi-jai bar. 2022-2023 jylytu mausymynda qala boiynşa tūrǧyn üilerge 308 datchik ornatyldy. Sonyŋ nätijesınde byltyr qalada bolǧan örttıŋ bırınde dybystyq qūrylǧynyŋ kömegımen bütındei bır otbasy aman qalǧan.
