Äne-mıne degenşe tamyz da bastalyp kettı. Būl – mektepke baratyn jetkınşekterdıŋ soŋǧy demalys mezgılı. Endı az künderden keiın bılım ordalarynda qoŋyraudyŋ syŋǧyrly dauysy estıledı. Oquşylar jüzderınen meiırım tögılgen ūstazdarymen qauyşady. Demalysta bolǧan äserlerımen bölısedı. Oqyǧan kıtaptary jaiynda aitady.
Kıtap demekşı, äsırese, elordalyq balalardyŋ demalysy kezınde Ortalyqtandyrylǧan kıtaphanalar jüiesı ne ıstedı, qandai şaralar ūiymdastyrdy degen oimen söz qozǧaudy jön körıp otyrmyz. Bügınde atalǧan mekemege 18 kıtaphana qaraidy. Sonyŋ ışınde altauy balalarǧa arnalǧan. Barlyq kıtaphanada 700 myŋǧa tarta kıtap qory saqtalǧan. Onyŋ 200 myŋǧa juyǧy – qazaq tılınde jaryq körgen dünieler. Kıtaphanalar jüiesıne elorda boiynşa 70 myŋnan asa oqyrman tırkelgen. Sonyŋ teŋ jarymy – balalar. Keiıngı jyldary jasöspırımderdıŋ kıtapqa degen qyzyǧuşylyǧy artqan. Būǧan ata-analardyŋ da yqpaly bar ekenı dausyz.
Kıtaphanalar jüiesı demalys kezınde jüzden astam şaralar ötkızudı josparlaǧan. Bügınge deiın onyŋ köbısı oidaǧydai öttı. Sonyŋ bıreuıne ǧana toqtalaiyq. Mäselen, 1 mausym – Halyqaralyq balalardy qorǧau künıne arnap qala äkımdıgı men kıtaphanalar jüiesı bırlesıp «Jaz bızge baqyt syilaidy» atty auqymdy şara ötkızdı. Onda balalarǧa arnalǧan kıtap körmesı, än men küige toly konsert, aulalyq otbasylyq klubtardyŋ jarysy ūiymdastyryldy. Däl osy mereke aiasynda №12 köpşılık kıtaphananyŋ kışkentai oqyrmandary äke-şeşelerımen «Ǧajaiyptar alaŋy» oiynyn oinady. «Raduga» ansamblınıŋ önerpazdary tamyljytyp än saldy. Astanalyq sirktıŋ äzılkeş ärtısterı Äzılbek Bolatov, Däulet Serǧazyūly, Aisūlu Äbdıkärım jäne Aqtoty Timur keştıŋ körıgın qyzdyrdy.
Sondai-aq, bas şahardyŋ 20 jyldyǧyna arnalǧan şaralardan kıtaphanalar jüiesı de tys qalmady. Däl qala künı hakım Abai eskertkışı alaŋynda «Abai ruhy jaŋǧyrǧan Ūly dala Astana!» atalǧan kıtap jäne poeziia merekesı öttı. Būǧan da jetkınşekterdıŋ qosqan ülesı mol boldy.
Qoǧamda balalar kıtap oqymaidy degen tüsınık bar. Mūnyŋ qate ūǧym ekenın bızge №3 balalar kıtaphanasynyŋ meŋgeruşısı Maral Aqtaeva aityp berdı.
« Bız jazǧy demalysqa mūqiiat daiyndalamyz. Balalarǧa arnap ötetın şaralardy äbden süzgıleimız. Aitalyq, bızdıŋ kıtaphanada mausymnan berı «Alaqai, jaz keldı, kıtap oqityn kez keldı» degen körme ötude. Biyl kıtaphana jüiesıne jaqsy qarjy bölıngendıkten 5-14 jas arasynda jetkınşekterge arnalǧan kıtaptar köptep satyp alyndy. Kün saiyn bızge 5-6 bala kelıp otyrady. Naqtyraq aitqanda, kıtaphanaǧa soŋǧy ekı aida 500-den asa jetkınşek kelgen. Keibır ata-analar balalaryn özderı jetektep alyp keldı. Bız kıtaphanaǧa 5 jastaǧy balǧyndardy da şaqyramyz. Olarǧa arnalǧan logikalyq oiyndar bar, sonymen oinap, uaqyttaryn ötkızedı. Äsırese, biyl jasöspırımderdıŋ keluı joǧary bolyp otyr» dedı kıtaphana meŋgeruşısı.
«Astana – kıtap oqityn qala» şarasy aiasynda balalar ädebietınıŋ beldı ökılderı – Mädi Aiymbetov, Tolymbek Äbdıraiym, Tıleuǧazy Beisenbek, Jädi Şäken, Qalqaman Sarin sekıldı qalamgerlermen taǧylymdy kezdesu ūiymdastyryldy.
Osy tamyz aiynda da otyzǧa tarta türlı tartymdy keşter, kıtap körmesın ötkızu közdelgen. «Sälem, kıtaphana» şarasy şeŋberınde jetkınşekter kıtaphanalarǧa ekskursiia jasaidy. Jasöspırımder özderı oqyǧan kıtaptaryn talqylaityn konferensiia ūiymdastyrylady. Saiabaqta kıtap oqu merekesı ötpek. Qysqasy, ortalyqtandyrylǧan kıtaphanalar jüiesı elordalyq balalardyŋ jazǧy demalysy qyzyqty ötu üşın bar mümkındıktı jasaǧan.
