Bır jyl būryn elordada elımızde teŋdesı joq Paralimpiadalyq jattyǧu ortalyǧy aşyldy. Qazırgı künı atalmyş nysan jūmysyna qatysty bırqatar tüitkılder anyqtalyp otyr. Nūr-Sūltan qalasy mäslihatyna mümkındıgı şekteulı jandar tarapynan ortalyqtyŋ qyzmet körsetu sapasyna bailanysty aryz-şaǧymdar kelıp tüsken. Keşe mäslihattyŋ tūraqty komissiialarynyŋ bırlesken otyrysynda osy mäsele qaralyp, jauapty organ basşylarynyŋ esepterı tyŋdaldy.
Aldymen baiandama jasaǧan Qalalyq ortany regenerasiialau basqarmasynyŋ basşysy Arjan Būǧybaev Paralimpiadalyq jattyǧu ortalyǧy memlekettık-jekemenşık ärıptestık aiasynda salynǧanyn aityp, ortalyq qyzmetın paidalanuşylardyŋ sany künnen-künge artyp kele jatqanyn jetkızdı. Mäselen, ötken aida nysanǧa 3 myŋǧa juyq kelu tırkelgen. Al jarty jylda qyzmettı paidalanu 13 myŋnan asyp ketken. Sonyŋ ışınde mümkındıgı şekteulı sportşylarǧa arnalǧan balalar-jasöspırımder sport mektebınıŋ tärbielenuşılerı, «Şarapat», «Nūrly jürek» ortalyqtarynyŋ emdeluşılerı, taǧy osy siiaqty arnauly mekemelerde emdeletınder ortalyq qyzmetıne jügıngen.
Ortalyqqa baratyndar negızınen trenajer zalyna köbırek barǧandy qalaidy. Sondai-aq, otyryp voleibol oinau, para-taekvondo, para-üstel tennisı siiaqty sport türlerımen ainalysatyn bıraz adam bar. Keiıngı kezde iogamen ainalysatyndardyŋ sany da artqan.
Alaida atalmyş ortalyqqa jetu mümkındıgı şekteulı jandarǧa qiyndyq tudyrady. Ortalyq Qaraötkel-3 kentınde ornalasqan. Qalanyŋ bır şetınde tūratyn mügedekter oǧan baru üşın qanşama uaqyt joǧaltady. Nysanǧa qatynaityn avtobustar da az. Tiıstı bılıktılıgı bar jattyqtyruşylar men nūsqauşylardan da tapşylyq sezılıp otyr. Otyrysta osy turaly aitylyp, qalalyq mäslihat deputattary men jinalysqa qatysqan mümkındıgı şekteulı jandar tarapynan ūsynystar aityldy. Atap aitqanda, ortalyqqa arnaiy avtobustardy jıberu, nysandardyŋ qoljetımdılıgıne qatysty karta jasau syndy ūsynystar qoldau tapty.
