Elorda äkımdıgı tūŋǧyş ret bas qalanyŋ jastaryna arnalǧan qaiyrymdylyq balyn ūiymdastyrdy. Oǧan qatysqan 150 qyz-jıgıt «Ritz-Carlton» qonaqüiınıŋ zalynda döŋgelene bi bilep, naǧyz ertegınıŋ atmosferasyn jasady.
Debiutanttardyŋ ışınde türlı mamandyq ielerı bar. Mūǧalım men därıgerdıŋ, käsıbi bişı men äskeri qyzmetkerdıŋ bır-bırımen jūptasyp bilep jürgenın körgende, atalmyş şaranyŋ astanalyq jastar üşın ideialar almasatyn alaŋ bola alǧanyn baiqadyq. Öitkenı olardyŋ bärın de ortaq bır müdde – qaiyrymdylyq jasauǧa degen qūlşynys bailanystyrǧan edı.
– Qatysuşylar bal bastalarǧa deiın qaladaǧy qarttar üiı men balalar üiıne, tūrmysy tömen otbasylarǧa baryp, ondaǧy jandardyŋ hal-jaiyn sūrap, qoldarynan kelgenşe köŋılderın köterdı. Jalpy, būl şarany qolǧa alarda bız de osyndai qaiyrymdy ısterdı barynşa keŋınen nasihattaudy maqsat tūttyq, – dedı Astana qalasy qoǧamdyq damu ısterı basqarmasynyŋ basşysy Daniiar Esin.
Keş qorytyndysy boiynşa «Bal hanşaiymy» ataǧy 18 jastaǧy Äziza Zeinollaǧa berılse, «Bal hanzadasy» tituly 21 jastaǧy Oralǧazy Taŋatqanovqa būiyrdy. Būlardan bölek, belsendı debiutanttarǧa «Jomart jürek», «Qaiyrymdy jürek», «Erekşe ülesı üşın», «Belsendılıgı üşın», «Ömırge degen qūştarlyǧy üşın», «Qaisarlyǧy üşın» atty arnaiy nominasiialar tabys etıldı.
Jiyn aiasynda auksion ūiymdastyrylyp, oǧan qylqalam şeberlerınıŋ kartinalary men türlı baǧaly zattary qoiyldy. Auksionnan tüsken qarjy Astanadaǧy qarttar men balalar üilerıne jäne tūrmysy tömen otbasylarǧa jūmsalady.
