Qazaqtyŋ qaisar tūlǧasy
Qazaqtyŋ bırtuar ūly Jūmabek Ahmetūly Täşenevtıŋ keler 2015 jyly 100 jyldyq mereitoiy respublika kölemınde atalyp ötuı tiıs. Kezınde elımızde joǧary lauazymdy qyzmetter atqarǧan asyl azamat elı men jerınıŋ qamaly, qorǧanyndai bolyp Keŋes odaǧynyŋ ämırşıl-äkımşıl bilıgıne qarsy tūrǧan qaharman edı. Qazır elımız täuelsız, halqymyz beibıt zamanda kün keşude. Bıraq, ūlt tarihyndaǧy osyndai eren eŋbegı bar tūlǧalardy laiyqty därejesınde baǧalai alyp jürmız be?! Endı osy qairatkerdıŋ ǧūmyrbaianyna arnalǧan kıtapqa nazar audaryp körsek.
2012 jyly «Ǧylymi qazyna» memlekettık baǧdarlamasy aiasynda Memleket tarihy institutynyŋ ǧalymdary Seiıtqali Düisen men Qanat Eŋsenovtyŋ «Jūmabek Täşenev» atty ǧylymi-zertteu eŋbegı tarih ǧylymynyŋ doktory, professor Bürkıtbai Aiaǧannyŋ redaksiiasymen «Ūly Dala tūlǧalary» seriiasy boiynşa jaryq kördı. Atalǧan kıtapta qairatkerdıŋ önegelı ömırı men taǧlymdy taǧdyry jäne tūtastai keŋestık däuırdegı uaqiǧalar men qūbylystar, el tarihyndaǧy talastar men tartystar baiandalǧan.
Jūmabek Täşenev esımı aŋyzǧa ainalyp, halyq jadynda saqtalǧanymen, resmi tarih ǧylymynda älı jan-jaqty zerttele qoiǧan joq. Kezınde Alaş qairatkerlerı «qazaq üşın kerek şaruany erteŋge qaldyrmaudy» aitqan edı, kıtap avtorlary da osy qaǧidany ūstansa kerek. Olar aituly tūlǧanyŋ Qazaqstan jerınıŋ tūtastyǧyn saqtap qalu jolyndaǧy küresın eŋ basty eŋbegı dep körsetken.
Keŋes elın N.Hruşev basqarǧan (1953-1964 j.j.) kezde Qazaqstandy bırneşe ölkege bölıp tastap, tübınde respublikany joiuǧa baǧyt ūstanǧany belgılı. Onyŋ bırsypyra jerın jyrymdap Özbekstanǧa, Türıkmenstanǧa, Resei Federasiiasyna bölıp bermekşı boldy. Oŋtüstık Qazaqstan oblysynyŋ Bostandyq audanyn 1956 jyly Özbekstanǧa berıp te ülgerdı. Qazaq Respublikasynyŋ basşylyǧy jer beruge qarsy ekenın bıldırgenımen, KSRO-nyŋ keudemsoq basşysy olardy tyŋdamady. Sodan soŋ 1960 jyly Qazaqstannyŋ soltüstıgındegı bes oblysyn (Soltüstık Qazaqstan, Kökşetau, Qostanai, Aqmola, Pavlodar) Resei Federasiiasyna berudı talap ettı. Sol kezde Qazaqstannyŋ Ministrler Keŋesınıŋ töraǧasy qyzmetın atqarǧan Jūmabek Täşenev būl KSRO men Qazaq Respublikasy Konstitusiiasynyŋ baptaryn būzuşylyq, halyq erkımen sanaspauşylyq ekenın, eger jerdı zaŋsyz beretın bolsa, Qazaqstan basşylyǧy halyqaralyq ūiymdarǧa şaǧymdanatynyn eskertıp, N.Hruşevtı kerı şegınuge mäjbür ettı. Osy qarsylyǧy üşın ony qyzmetınen ketırdı.
«Täşenev taǧylymyn qalai baǧalauǧa bolady?» degen mäselege kelsek, ol elınıŋ, jerınıŋ tūtastyǧy üşın basyn bäigege tıkken ūltjandy qairatker. Eger qarsy şyǧyp, qaisarlyq körsetpese, Qazaqstannyŋ besten bır bölıgı 1960 jyly Reseige berılıp, respublikamyz täuelsızdık alǧan jyldary ol jerler kerı qaitarylmai qalar edı. Sondyqtan, onyŋ ūltjandylyǧy keiıngı ūrpaqqa ülgı-önege. Onyŋ erlıgın jastarǧa nasihattau – barşamyzdyŋ paryzymyz.
Jabai QALİEV,
Memleket tarihy institutynyŋ jetekşı ǧylymi qyzmetkerı