Astana äkımdıgınde äleumettık älsız otbasylardyŋ sifrly derekter qory qūryldy. Qazırgı uaqytta bazada 10095 otbasy tırkelgen.
Astana qalasy äkımınıŋ orynbasary Malika Bektūrova būl jūmys äleumettık qorǧau jäne jūmyspen qamtu salasynyŋ sifrlandyru bölıgı ekenın atap öttı. Atalmyş derekqor qala äkımdıgıne kömekke mūqtaj otbasylar jäne onyŋ qajettılıkterı turaly aqparatty bılıp otyruǧa mümkındık beredı jäne atauly äleumettık kömektı neǧūrlym tiımdı körsetuge septıgın tigızedı.
– Bız būl derek qoryna 32 aqparattyq derekközdı toptastyrdyq, memlekettık jäne jeke bazalardy bırıktırdık. Ol aqparattar derekköz bazasyn tolyqtyryp, bızge är otbasy turaly tolyq mälımet beredı, – dedı äkım orynbasary.
Derekköz qorynda aqparattar ırıkteledı. Onda atauly äleumettık kömek aluǧa bolatyn köpbalaly, az qamtylǧan jäne mügedek jan bar otbasylar turaly aqparat körsetıledı. Jūmyspen qamtu jäne halyqty äleumettık qorǧau basqarmasynyŋ, audandyq äkımdıkter, mektep qyzmetkerlerı, polisiianyŋ uchaskelık inspektorlary otbasy müşesınıŋ kez kelgenınıŋ JSN-ın engızıp, balalardyŋ ata-anasy qaida jūmys ısteidı, balalar qaida oqidy, otbasy qandai järdemaqy alady, qandai mülık ielenedı, olardyŋ tūrǧyn üi jaǧdaiynyŋ qandai ekendıgıne qatysty tolyq aqparat alady. Būl baza ünemı tolyqtyrylyp otyrady. Sondai-aq köpbalaly, az qamtylǧan otbasylarmen jūmys ısteitın qyzmetkerler üşın qosymşa äzırlendı. Är qyzmetker belgılı bır otbasyǧa qatysty aqparatty tolyqtyra alady. Bazada otbasynyŋ qazırgı qajettılıkterı jäne ol mäseleler qalai şeşılıp jatqany da körsetıledı.
– Eger üi peşpen jylytylyp, alaida uly gaz datchikterı ornatylmasa, sol olqylyqty joiamyz. Bızde balalarmen äleumettık pedagog jūmys ısteitındıgı, özderıne arnalǧan keŋse zattaryn alatyndyǧy, mektepke daiyndyǧy, olardyŋ özderıne tiesılı kömektı alyp otyrǧandyǧy sekıldı mäseleler tolyǧymen körsetılıp tūrady, sondai-aq azamattardyŋ jeke ötınış-şaǧymyn körıp otyratyn bolamyz. Mysaly, jergılıktı atqaruşy organdarǧa jazylǧan ötınış qalai şeşılıp jatyr? Mıne, osynyŋ bärın qadaǧalap otyramyz, – dedı äkım orynbasary.
