Мейірім шуағына шомылды
Қазақстан» орталық концерт залында «Алғыс айту» күніне орай «Мың алғыс» атты қайырымдылық концерті өтті. Кешті «Қазақ радиолары» ЖШС ұйымдастырды.
Мейірім шуағына шомылған кеш өте әсерлі болды. Өмірде адамға қайырымды болудан, қамқорлық жасаудан артық ізгілікті іс жоқ. Оған тағы бір көзіміз жетті. Шара барысында түрлі тағдырларды бастан кешкен кейіпкерлердің армандары жүзеге асты. Мәселен, он төрт жыл суқараңғы қалып, анасының жүзін бір көрсем деп армандаған Дүрдананың еміне Қазақ радиосының эфирінен шығатын «Жан жылуы» бағдарламасы арқылы екі миллион теңге қаржы жиналған. Соның кішкентай арудың еміне шипасы тиіп, Дүрдана дертінен айықты. Оның сол күні әнші Гүлнұр Оразымбетовамен бірге ән салсам деген ойы да орындалды. Көкшетаудағы Қошқарбай ауылында тұратын бір отбасы балалар үйінен 11 жеткіншекті асырап алған. Осындай сауапты дүниеге қадам басқан ата-ананы сахнаға шығарып, қошемет көрсетті. Одан кейін «Бармысың, бауырым!» бағдарламасы арқылы сұрау салып, отыз жылдан бері кездеспеген әскердегі достар сахнада қауышты. Әсіресе, жиырма екі жыл бойы бірін-бірі көрмеген ана мен баланың кездесуі жиналғандарды ерекше толқытты. Залда көзіне жас алмаған адам қалмады.
Жалпы, кештің мақсаты туғаннан қос жанары суқараңғы бір жасар Арманның шетелдегі еміне үш миллион теңгедей қаржы жинап беру болатын. Былтыр қыркүйек айында «Жан жылуы» бағдарламасына Арманның анасы Меруерт Айдарәлиева хабарласып, көмек сұраған екен. Енді, міне, осы мақсат орындалды. Балдырғанның дертіне жұмсалатын қаржы жиналды. Шараға қазақтың жүрегі кең жомарт азаматтары да қатысып, олар қайырымдылық шарасына өз үлестерін қосты.
Кеш барысында Қарақат Әбілдина, Жұбаныш Жексенұлы, Елена Әбдіхалықова, Маржан Арапбаева, Тамара Асар, Құрмаш Махан, Роза Әлқожа, Медет пен Клара Салықовтар, Сүндет Байғожин секілді өнер жұлдыздары ән шырқап, жиналғандардың көңілдерін көтерді.
Азамат ЕСЕНЖОЛ