Мерекеге сән қосқан тоғызқұмалақ
20 наурыз – Ұлттық спорт күніне орай Еркеғали Рахмадиев атындағы Мемлекеттік академиялық филармониясында мәдениет қызметкерлері арасында қазақ халқының ұлттық ойындарының бірі – тоғызқұмалақтан жарыс өтті.
14 наурыздан басталған наурыз тойы әлі жалғасып жатыр. Бүгінгі «ұлттық спорт күніне» орай мәдениет саласының қызметкерлері арасында халқымыздың ақыл-ойды дамытатын ұлттық ойыны тоғызқұмалақтан жарыс ұйымдастырылды. Бұл да – ұлттық құндылықтарымызды ұлықтаудың бір көрінісі. Жарысқа қатысқан ойыншыларға табыс тілеймін, – деді жарыстың ашылу салтанатында сөз сөйлеген Астана қаласы мәдениет басқармасының басшысы Жаңабай Мейірманқұлов.
«Ұлттық спорт – ұлтымыздың мақтанышы және ұлттық бренді» атты ұранымен достық қарым-қатынасты нығайту және мәдени мекемелер арасында ұлттық спортты дамыту мақсатында ұйымдастырылған жарысқа Астанадағы мекемелерден 10-нан аса ойыншы бақ сынады. Жарыс соңында жеңімпаздарға 1, 2, 3-орын бойынша арнайы жүлделер берілді.