Объективте – әр алуан Астана
«Бәйтерек» монументі алдындағы алаңда екінші мәрте халықаралық PHOTOfest.KZ фотокөрмесі ашылды.
Астанаға арнайы келген кәсіби фотографтар 5-8 шілде аралығында елорданың әр қырын суретке түсірген болатын. Осы жылғы фестивальдің бір ерекшелігі, 20 фотограф нақты 20 бағытты таңдап, жұмыс істеді. Олар бас қаланың әлеуметтік-экономикалық, мәдени-рухани келбетін жан-жақты қамтып, көрсетуге тырысты. Халықаралық көрмені ҚР Мәдениет және спорт министрлігі Астананың 20 жылдық мерейтойына орай ұйымдастырып отыр.
«Астана – шетелдік фотографтардың объективінде» атауымен өткен фотокөрмеде Қытай, Жапония, Франция, Италия, Германия, Англия, Ресей, Армения, Әзербайжан сынды елдерден келген кәсіби фотографтардың ең үздік шыққан 200-ге жуық туындысы қойылды. Олардың арасында Қазақстан Президенті Нұрсұлтан Назарбаевтың ерекше суретін түсіріп, әлеуметтік желіде бірден танымал болған Армения Президентінің жеке фотографы Давид Акопян, суретті түсірудің ерекше әдістерімен көзге түскен мәскеулік Валерий және Наталья Черкашиндар бар.
Келем деушілерге есік ашық, фотокөрме 1 ай бойы жалғасады.