7 қазан күні Бейбітшілік және келісім сарайында «Сәт» тобының «Өмірге ғашықпын» атты концерті өтеді. Кеш сағат 19.30-да басталады.
Ақиық ақын Мұқағали Мақатаевтың өлеңіне жазылған композитор Садық Қынаттың «Көнеміз ғой» әнімен тұсауы кесілген топтың өнерге аяқ басқанына биыл 8 жыл толды. Содан бері бірнеше байқауға қатысып, жүлдегерлердің қатарынан көрінуде.
«Сәт» алғашқы жүлдесін Астанада өткен республикалық байқауда алды. Бұдан соң Санкт-Петербург қаласындағы «Кастальский ключ» халықаралық байқауда үздік атанып, мүмкіндігі шектеулі жандарға арналған «Самғау» ұлттық қоғамдық сыйлығына лайық деп танылған.
Бастапқыда Азат, Тұрар, Сапарбай атты тағдырлары Шымкент қаласындағы зағиптарға арналған «Үміт» мектеп-интернатында тоғысқан ұлдардан құралған топ құрамы бүгінде жаңарып, репертуарын патриоттық, махаббат, өмірлік құндылықтар туралы әндермен толықтырды. Репертуардағы біраз әндердің авторы – топ орындаушысы Азат Әділбаев.
«Аманат» авторлық және аралас құқықты қорғау жөніндегі қауымдастық қолдауымен өтетін кеш қонақтары белгілі эстрада әншілері Маржан Арапбаева және Асхат Тарғын.
Аманғали ҚАЛЖАНОВ
