«Біздің басты жетістігіміз – тәуелсіз Қазақстанды құрғанымыз. Біз шекарамызды заңдық тұрғыдан рәсімдедік. Елдің тұтастандырылған экономикалық кеңістігін құрдық». Елбасы Нұрсұлтан Назарбаев «Қазақстан-2050» Стратегиясы: қалыптасқан мемлекеттің жаңа саяси бағыты» атты Қазақстан халқына арнаған биылғы Жолдауында осылай деді.
Иә, Кеңес Одағы құлағаннан кейін еліміз өзінің көшін түзеді. Түрлі кедергілерді жеңіп, қиындықтарды артқа қалдырды. Бүгінде Қазақстан бәсекеге қабілетті мемлекет ретінде дамуға қол созуда. Бүкіл әлемде өз орны, бедел биігі бар іргелі мемлекетке айналды.
Қазіргі таңда әлем елдері Қазақстанға көз тігіп отыр. Дүниежүзі сарапшылары арасында «қазақстандық үлгі» термині пайда болды. Бұған мысал көп. 17 мың аралдың елі аталатын Индонезияның астанасы Жакарта қаласындағы Панкасила университетінің экономика факультетіндегі басқару мәселелері жөніндегі департаменттің профессоры, экономика, шешендік өнер, менеджмент тақырыбына қатысты 4 кітаптың, 15-ке жуық мақала мен зерттеу еңбектерінің авторы Гатут Лухур Будионодан былтырғы жылы елімізге келген сапарында сұхбат алғанымда өз елінің жағдайын Қазақстанмен салыстыра келіп, ол былай деген еді: «Біздің елде халықтың алдымен бас қатыратын мәселесі – азық. Яғни, күн сайынғы тамағын тауып жеуді көбірек ойлайтын тұрғындардың ойдағыдай білім алуларына жағдайлары жоқ. Білім қуып, оқудың қыр-сырын меңгеруге ұмтылғандар да жоқ емес, бірақ ондайлар аз. Ауылдық жерлерде тұратындардың көбі мұғалім болып жұмыс істеуге ұмтылады. Жоғары білімге қол созғандар біліктілігін одан әрі дамыту үшін көрші қалаларда оқуын жалғастырады. Алайда елдің 100 миллионға жуық тұрғыны кедейшілікте өмір сүруде. Еліміз 1990-1991 жылдары экономикалық ауыр дағдарысты басынан кешірді. Кеңінен тараған парақорлық пен бюрократия да Индонезияның ойдағыдай дамып, өркендеуіне қолбайлау болып отыр. Сонымен бірге, Индонезияда жиі болып тұратын су тасқыны мен зілзала да халықтың әлеуметтік жағдайының жақсы деңгейге көтерілуіне кері әсерін тигізуде.
Ал сіздің елдің тұрғындары ертеден кешке дейін еңбек етеді екен. Тұрғындары мұндай ырғақпен жұмыс істейтін мемлекет дамудың биік шыңына жете алады деп ойлаймын. Жалпы индонезиялықтардың көбі Қазақ-станды жақсы біледі. Сіздердің Елбасыңыздың суреті біздің елдің кейбір қалаларының көшелерінде ілулі тұр. Сірә, қайбір жылдары мемлекет басшыларының басқосуы өткен кезде ілінген шығар. Жалпы әлем елдері Нұрсұлтан Назарбаевты жақсы біледі, құрметтейді.
Менің білуімше, біздің ел сіздің елдің экономикалық даму үрдісін өзіне үлгі етеді. Жоғары дамуға ұмтылушы еңбекқор ел ретінде құрмет тұтады. Сіздің ел – өте бай ел. Халықтың әлеуметтік жағдайының өте жақсы екендігін көрдім. Біздің елмен салыстырғанда сіздерде бай, дәулетті адамдар көп».
Аз-кем уақыттың ішінде өткен кездесуде индонезиялық профессор Елбасымыз Нұрсұлтан Назарбаевтың Қазақстан халқына жыл сайын арнайтын Жолдауының мәнділігін, көреген саясаткерлігі мен еліміз тұрғындарының еңбекқорлығын қайталап айтумен болды. Ол дамудың жоғары сатысына қол созушы қазақтай ұлттың дархандығына таңдай қаққан жалғыз Гатут Лухур Будионо емес, ондай шетелдіктер көп.
Өйткені, ұлттық экономикасы қарыштап даму сатысындағы елдің әлеуметтік ахуалы да жақсы болмақ. «Мықты мемлекет күнкөріс саясатымен емес, жоспарлау саясатымен, ұзақмерзімді дамумен және экономикалық өсумен айналысады». Бұл да Елбасымыздың Жолдауындағы сөзі. Олай болса, Президентіміз Нұрсұлтан Назарбаевтың Жолдауындағы мемлекетіміздің ертеңіне бағыт сілтер ойлары жүзеге аса беретініне сенім мол. Себебі, елдің жарқын болашағының әр кірпіші үлкен сеніммен ғана қаланады.
Жанар НҰРҒАЛИЕВА,
Заң шығару институты
лингвистика орталығының
ғылыми қызметкері