ПАТРИОТТЫҚ ӘНДЕР ФЕСТИВАЛІ
«Нұр Отан» ХДП Ардагерлер және әскери-патриоттық бірлестіктері қоғамдық кеңесі мен Ауғанстан соғысы ардагерлері республикалық одағының ұйымдастыруымен «Әнім саған, Қазақстан!» атты патриоттық әндер фестивалі мәресіне жетті. Қазақ гуманитарлық заң университетінде өткен шара биыл төртінші рет жалғасын тауып отыр.
Тұңғыш Президент күніне арналған өнер додасында еліміздің түкпір-түкпірінен келген үміткерлер бақ сынасты. Қазылар алқасының шешімімен бас жүлдені қостанайлық Әйгерім Балабекова иеленсе, Оңтүстік Қазақстан облысынан келген Сымбат Танагөзова бірінші орынды қанжығалады. Астана қаласының намысын қорғаған жерлесіміз Мәдина Қапанова екінші орыннан көрінді. Сонымен қатар, петропавлдық Виктория Ильина, Хантөре Төреханова, Несіпбай Нұрлан сынды өнерпаздар арнаулы сыйлықтармен марапатталды.
Жеңімпаздардың дипломдарын тапсыруға арналған салтанатты рәсімде «Нұр Отан» партиясы Ардагерлер және әскери-патриоттық бірлестіктері қоғамдық кеңесінің хатшысы, Ауғанстан соғысы ардагерлері республикалық одағының төрағасы Шәріпбай Өтегенов сөз сөйлеп, «Бұл шараның келешек буынға берері мол. Патриоттық әндері неғұрлым көп насихаттасақ, Отанын сүйетін, жерін, елін ардақтайтын, ұлтын мақтаныш тұтатын ұл-қыздарымыз да көбейе береді» деп атап өтті.
Асхат РАЙҚҰЛ