Қала қуатының қайнаркөзі
Жылу мен жарық – қала тіршілігінің негізгі қан тамырлары. Осы екеуінсіз шаһар тірлігін елестету мүмкін емес. Елордаға таратылатын электр энергиясының 60 пайызға жуығы «Астана-Энергия» АҚ-ның 2-Жылу электр орталығында өндіріледі. Күндіз-түні тыным таппайтын кәсіпорынның ішкі ахуалына біз де үңіліп көрдік.
Қуаты артқан өндіріс
Тәулік бойы көк түтін будақтап, алыстан «менмұндалайтын» 2-ЖЭО ғимараты астаналықтарға жақсы таныс. 1979 жылы іске қосылған жылу стансасының жалпы электрлік қуаты сағатына 360 МВт болса, жылу энергиясының күші сағатына – 1021 Гкал-ды құрайды. «Астана – Энергия» АҚ басқарма төрағасының бірінші орынбасары Олег Уткиннің айтуынша, 2-ЖЭО былтыр мөлшері 2 млрд 405 млн кВт/сағ электрэнергиясын өндірген. Ал жылу энергиясының көлемі – 5 млн 122 мың гигакалорий. Бұл 2011 жылмен салыстырғанда 30 млн 600 мың кВт/сағ артық көрсеткіш екен.
– Мұндай нәтижеге №4 турбоагрегат күрделі жөндеуден өткеннен кейін қол жеткіздік. Бұл қондырғы зауыттық қуатына қайта оралып, электрэнергиясын сағатына 120-125 МВт көлемінде өндіріп отыруға мүмкіндік береді, – дейді Олег Вальеревич.
Елбасының тапсырмасымен іске қосылған 4 су жылытқыш қазандықтың арқасында жылу энергиясы да алдыңғы жылдармен салыстырғанда, 472 мың Гкал артығымен өндірілген.
Жарық пен жылудың мөлшерін көбейтіп, ЖЭО-ның қуаттылығын арттыруға бағытталған жұмыстар келешекте де жалғасын таба бермек. Бүгінде «ЖЭО-2-ні кеңейту және қайта жаңғырту» жобасы шеңберінде 7-ші және 8-ші қазандықтар іске қосылмақ. 2016 жылға қарай екі ірі энергетикалық қазандық агрегатын пайдалануға беру жоспарланып отыр. Бұл қазандықтар электр сүзгісі мен күкірт тазалағышы бар заманауи қондырғы болмақшы.
Ал биыл жыл соңына қарай қуаттылығы 120 МВт 5-ші турбоагрегат, келесі жылы сағатына 120 МВт болатын №6 турбоагрегатын да пайдалануға беру жоспарланып отыр. Жаңа қондырғыларды орнатып, қолда бар құрылғыларға жөндеу жұмыстарын тиянақты жүргізген ЖЭО ұжымы 2012-2013 жылдарға арналған жылу беру маусымын ойдағыдай атқарыпты.
Алып «темірлердің» әлеуеті
Әкімшілік отыратын ғимаратпен жапсарлас орналасқан негізгі өндіріс орнына қарай бет алдық. Дәлізден өтіп, үлкен темір есікті ашқанымыз сол, гүрілдеген дауыстан құлағымыз тұнып кетті. Ғимараттың іші де қапырық екен. Жылу өндіретін кәсіпорын екенін айтқызбай-ақ ұғындырып тұр. Айналаның бәрі «темір-терсек».
Өндіріс табалдырығын аттамай жатып-ақ, гүріл мен дірілден есіміз шығып тұрған біздің түріміз жанымызда еріп жүрген Сенімділік және техникалық қауіпсіздік қызметінің басшысы Уәлихан Асқарбековке қызық көрінді білем, жымиып қойды.
– Біздің даусымыз да осы гүрілдектен кем түспейді. Егер айқайлап сөйлеп бара жатқан адамды көрсеңіз, жылу энергетика орталығында жұмыс істейді деп ойлай беріңіз, – деп әзілдеп қойды ол.
Уәлихан Дайрашұлымен ілесіп, орталық жылу басқару орнына келдік. Мұнда екі қазандық пен екі турбоагрегатты басқарып отырған машинистер отырады екен. Олардың алдында қаптаған пернесі мен тетігі бар техника тұр. Қабырғадағы сағат тәріздес құрылғылардың саны да одан қалыспайды. Уәлихан Дайрашұлының айтуынша, бұл су мен будың қысымын, атомосферасын, ток пен кернеудің көлемін, қуат шығынын есептеп тұратын өлшегіш құралдар екен. Олардың жұмысын машинистер мүлт жібермей бақылап отырады. Машинистер демекші, жылу орталығында осы мамандар ерекше бағаланады. Оларға үлкен жауапкершілік жүктеледі. Осында машинист болу үшін энергетика саласының майда-шүйдесіне дейін жетік меңгеріп, өндірістің төрт сатысынан өту керек. Алдымен күлді сумен шығаруды бақылайтын маман жұмысын игеру керек. Бұдан кейін көмірді балғалап, майдалау қондырғысын бақылауды үйрену қажет. Осыдан кейін қазандықтың төменгі бөлігіндегі қосымша қондырғыларды бақылаушы, төртінші, қазандықтың жоғары жағында тұрған қондырғыларды бақылаушы қызметінен өтіп, әбден шыңдалу керек. Осы төрт саланы меңгеріп, емтиханнан мүдірмей өткен маман ғана қазандықтың «құлағын» ұстайды.
Жылу электр орталығының көздің қарашығындай сақтайтын қазандығы – біз білетін кәдімгі қазан емес. Оның сыртқы пішіні құбырға ұқсайды. Жылу мен жарықты өндіру осы қазандықтағы суды жылытудан басталады. Алдымен қоймадағы көмір бульдозермен конвейерге тиеледі де, қазандықтардың бункерлеріне, сосын көмірді майдалап үгетін балғалы диірменге жеткізіледі. Содан кейін көмір қазандық пештеріне келіп түседі.
Пешке тамызық ретінде бірінші мазут жағылады. ЖЭО-ның бетон мұржасынан кейде қою қара түтін шығып тұратынын байқаған боларсыз. Бұл – мазут жағылып жатыр деген сөз.
Қазандықтар әбден қызып, температурасы – 555 градус, қысымы 140-қа жеткенде, мазут жағу тоқтатылып, оның орнына пешке әбден ұнтақталған көмір салына бастайды. Сол кезде мұржаның түтіні де ағарады. Қазандық 3,5 сағат қыздырылғаннан кейін барып, өзінің зауыттық параметріне келеді екен.
Әбден қызған қазандық қайнап, суды буға айналдырады. Одан сағатына 420 тонналық ыстық бу шығады. Бу қатты қысымның күшімен турбоагрегаттарға жiберiледi. Жоғарғы қысымды бу алдымен турбинаны және онымен бiр бiлікте орнатылған электр генераторын айналдырады.
Генератордан энергия бөлiнедi. Ток кернеуі – 10 500 вольтті құрайды. Пайда болған қуат көзі генераторлардан кернеуді жоғарылататын трансформаторға беріледі. Осы жерден 110 мың вольт мөлшеріне дейін күшейген кернеулер Ақмола аумақтық электр желілерімен қалаға жеткізіледі. Ал жарықты елордалық тұтынушыларға тарататын – «Астана – РЭК» АҚ (бұрынғы «Қалалық электр желілері»).
Әрине, мұның бәрі ауызбен айтуға ғана жеңіл. Әйтпесе, жарық пен жылу энергиясы өндіріліп шыққанша, олардың қысымы, көлемі, кернеуі қалыпты мөлшерде болып, тепе-теңдігін ұстап тұруын қадағалау – оңай жұмыс емес. Мысалы, турбинадағы қысым қалыптағыдан асып кетсе, онда минутына 3 мың айналым жасайтын алып «темір» айналаны әп-сәтте күл-талқан етуі мүмкін. Турбогенераторда пайдаланылғаннан кейін бу турбина конденсаторына түсіп, салқындап, қайтадан суға айналады. Конденсаторды салқындататын су градирняда суиды. ЖЭО екенін айғақтап тұратын үш үлкен мұнараны білетін боларсыз? Градирня, яғни су салқындатқышыңыз осы. Егер қысымы мен температурасы төмендеген буды тез арада суға айналдырмаса, онда турбина айналмай, кептеліп қалады екен.
Бұдан өзге, температурасы төмендеген суды ысытатын қазандықтар да бар. Елбасының қатысуымен тұсауы кесілген осы қондырғылардың қыстан қысылмай шығуға көмегі көп болған екен.
Қазандықтар компьютермен басқарылады
«Астана-Энергия» АҚ-да 1278 адам жұмыс істейді. Соның 800-дейі – екінші Жылу электр орталығында. Өндірістік мекеменің қазандығында – 30, турбинасында 20 машинист бар. Оларды бір-бір аға маман бақылайды. Басқа сала секілді, жылу электр орталығы да соңғы үлгідегі тың технологиялармен жабдықтала бастапты. Біз барған екінші орталық жылу басқару бөліміндегі кейбір қазандық пен турбоагрегат компьютермен басқарылады екен.
Әрине, 1979 жылдан бастап орнатылып, 1984 жылы аяқталып біткен бұрынғы басқару пульттеріне өкпе жоқ. Бұл техника әлі күнге дейін мүлтіксіз жұмыс істейді. Ал жаңа технологияның артықшылығы – ыңғайлы. Адам күшін көп қажет етпейді. Қондырғылардың жұмысын монитордан бақылап отырасыз. Енді бірнеше жылда қолда бар қазандықтар мен турбоагрегаттардың түгелі автоматтандырылған басқару жүйесіне көшетін болады, – дейді Уәлихан Асқарбеков. Монитор алдында жайғасқан жігітті әңгімеге тарттық. Өзін 6-шы қазандықтың машинисі Аманболат Жұмашев деп таныстырған ол жылу беру маусымы аяқталуына байланысты ЖЭО-2-дегі алты қазандықтың тек үшеуі жұмыс істеп тұрғанын айтты.
– Әзірше үш қазандықтың өзі қаланы тегіс жарықпен қамтуға жеткілікті болып отыр. Ал қыста қазандықтың алтауы да жұмыс істейді. Егер аумақтық диспетчерлік орталықтан жарықты көбейту тұралы сұраныс түссе, онда резервте тұрған қазандықтарды іске қосамыз, – дейді машинист.
Кезінде жылу энергетика орталықтарында маман тапшылығы байқалған екен. Ал қазір еліміздің ірі қалаларындағы оқу орындарда энергетика мамандықтары көптеп ашылғалы сұраныс әжептәуір азайыпты. Дегенмен де білікті мамандардың бұл салаға артық болмайтыны анық.
Түтін де тазартылады
ЖЭО – 2-де орталық жылу басқару бөлімдерінен басқа, көптеген цехтар бар. Атап айтқанда, электр, отын тасымалдау, құрылыс-жөндеу, жылу автоматикасы және өлшегіш цехтары, химия және автокөлік цехтары. Соның ішінде қоршаған ортаны қорғау зертханасына айрықша тоқтала кеткеніміз жөн. Өйткені жылу энергетикалық орталығынан шығатын қалдықтардың қоршаған ортаға қаншалықты әсер ететіні кім-кімді де толғандырары анық. Аталған зертхана осы мәселемен айналысады. Мұндағы зертханашылар өндіріс орнынан шығып жатқан түтінді арнайы тексерістен өткізеді екен. Егер түтін құрамындағы азот қышқылы, көміртегі, басқа да заттар шамадан тыс көбейіп кетсе, дереу мамандарға хабарлап, шара қолдануды талап етеді.
Қазіргі таңда түтінді тазалауға эмульгатор қондырғысы қолданылады екен. Осы қондырғыға қосымша су берген кезде түтіннің күлдері суланып ішке түседі де тек таза газы ғана көкке көтеріледі. Оның құрамындағы азот қышқылы (NOx) белгіленген мөлшерден аспайды. Демек, қоршаған ортаға да зияны жоқ.
Қымбат ТОҚТАМҰРАТ