Елордада қолма-қол ақшасыз есеп айырысуды ұлғайту мақсатында POS-терминалдар енгізіледі. Мемлекет басшысы Қасым-Жомарт Тоқаев елорданы одан әрі дамыту жөніндегі кеңесте қолма-қол ақшасыз есеп айырысуды ұлғайтып, елорданың сауда орындарында кассалық аппараттардың болуын бақылауға алуды тапсырған болатын.
Осы ретте елорда әкімі А.Көлгінов Mastercard өкілі Н.Виллемемен «ақылды қалалар, ақылды бағыттар» қалалық туризм бойынша UNWTO VIII жаһандық саммиті аясында қолма-қол ақшасыз есеп айырысуға көшуді талқылады.
Кездесу барысында Mastercard халықаралық төлем жүйесі Нұр-Сұлтан қаласы әкімдігімен және екінші деңгейдегі банктермен бірлесіп туристік нысандарда (кафе, мұражайлар, галереялар, көрмелер және т.б.) қызметтер мен сервисті кеңейту бойынша жұмыстар жүргізетін болады. Жоба жүзеге асқанда көрсетілген қызметтерді қолма-қол ақшасыз есеп айырысу есебінен төлеуге болады. Ол үшін қосымша POS-терминалдар орнатылады.
