Бүгін «Қазақстан» Орталық концерт залында Құрманғазы атындағы Қазақ мемлекеттік академиялық халық аспаптары оркестрінің ел тәуелсіздігінің 25 жылдығына арналған «Ұлы дала мұрасы» атты мерекелік концерті өтеді. Осыған орай кеше ҚР Президенті жанындағы Орталық коммуникациялар қызметінің брифингіне қатысқан оркестр жетекшілері өнер ұжымының жаңалықтарымен бөлісіп, елордадағы кеш жөнінде ақпараттандырды.
Құрманғазы оркестрінің тарихы өткен ғасырдың отызыншы жылдарынан тамыр тартады. Оның басында әйгілі музыкатанушы, композитор Ахмет Жұбанов тұр. Алайда, қарашаңырақ өнер ұжымы елордада алғашқы мәрте концертін бергелі отыр.
«Осыған дейін оркестр әлемнің сексеннен астам елінде болып, шетел жұртын өнерімен тәнті етті. Бұл арқылы қазақ музыка мәдениетін әлем танып, оған Мемлекет басшысы «Қазақтың інжу-маржаны» деген ат бергенін өздеріңізге мәлім. Күллі әлемге қазақтың өнерін таныстырып келе жатқан оркестрдің Қазақстандағы өнер ұжымдарының арасындағы алатын орны ерекше. Тәуелсіздіктің жиырма бес жылдығына орай ұйымдастырылған кешіміздің алғашқы бөлімінде қазақтың төл шығармалары орындалатын болса, екінші бөлімінде әлемнің классик композиторларының шығармаларын қазақ оркестрі орындайды» дейді оркестрдің директоры Нұрғиса Дәуешов.
Оның айтуынша, оркестр араға 18 жыл салып екінші үнтаспаны шығарғалы отыр. Репертуарын да жаңғырта, жаңарта отырып, заман ағымынан қалмай алға басуда.
«Қазіргі таңда біз репертуарды жан-жақты кеңейтіп, қазақтың дәстүрлі музыкасымен қатар, заманауи және әлем классиктерінің шығармаларын мүмкіндігімізше өңдеп отырамыз. Ескі партитураларымызды жаңартып, электронды жүйеге келтіру мәселелері басты назарда ұсталып отыр» дейді оркестрдің бас дирижер Арман Жүдебаев.
Өнер ұжымының репертуарына келсек, онда Құрманғазының күйлерінен бастап, Дина Нұрпейісованың, Дәулеткерейдің, өзге де Батыс Қазақстан күй мектебі өкілдерінің төкпе күйлері, Тәттімбет Қазанғапұлы сынды Арқа күйінің негізін салған күйшілердің, Ахмет Жұбанов, Евгений Брусиловский, Сыдық Мұхамеджанов, Мәкәлім Қойшыбаев, Нұрғиса Тілендиев, Кенжебек Күмісбеков, Мыңжасар Маңғытаев сынды қазақтың классик композиторларының, Сергей Прокофьев, Михаил Глинка, Арам Хачатурян, Дмитрий Шостакович, Петр Чайковский, Жорж Бизе, Джоаккино Россини сияқты әлем мойындаған композиторлардың шығармалары бар.
Елордадағы кеште оркестрдің сүйемелдеуімен осы композиторлардың туындыларын Майра Мұхамедқызы, Гүлнұр Оразымбетова, Салтанат Ахметова, Батыржан Мықтыбаев, Ерлан Рысқали, Еділ Құсайынов, Әсел Рақымжан, т.б. танымал әншілер орындайды.
Аманғали ҚАЛЖАНОВ
