Биыл көрнекті қоғам қайраткері, дауылпаз ақын Сәкен Сейфуллин музейінің құрылғанына отыз жыл толды.
Ардақты азамат есімі 1957 жылы жазықсыз жаладан толық ақталып шықса да, қайраткерге арнап музей ашу жабық күйінде қала берді. Тек 1980 жылдардың орта кезінен бастап қаланың көзіқарақты қариялары Сәкенге арнап мұражай ашу туралы мәселе көтереді. Ақыры осы ізгілікті бастама шешімін тауып, 1988 жылы 20 ақпанда Қазақ КСР Министрлер Кеңесінің сол кездегі төрағасы Нұрсұлтан Назарбаевтың қаулысымен Сәкен Сейфуллин мұражайы ашылды.
Кеңес өкіметі кезінде Ақмолада қазақтың қасиеті мен болмысы сақталған үш мекеме болды. Біріншісі – атақты діни қайраткер Сәдуақас Ғылмани атамыз іргесін қайта көтерген ескі мешіт, екіншісі – Жамбыл атындағы №4 қазақ орта мектебі, үшіншісі – Сәкен мұражайы.
Сәкен мұражайының алғашқы тізгінін ұстаған Роза Асылбекова деген апамыз. Бұл кісінің киелі шаңырақтың қалыптасуына сіңірген еңбегі зор. Музейдің экспонаттарын толықтыруға Өзбекәлі Жәнібеков ағамыздың қолдауы да көп болған. Бұл уақытта ақынның асыл жары Гүлбахрам апамыз дүниеден озған. Алайда Сәкеннің көзін көрген адамдар мен жақындары бар болатын. Музей қызметкерлері ең алдымен қайраткерге қатысты құжаттардың көшірмелерін, отбасының тұтынған заттарын жинайды. Мәскеудегі кинофотоқұжаттар мұрағатына, Алматыдағы мемлекеттік мұрағаттар мен мұражайларға, Сәкен қызмет атқарған Қызылорда, Ташкент қалаларына, кіндік қаны тамған жері Жаңаарқаға барып, зерттеу жұмыстарын жүргізеді. Асыл тұлғаны көрген адамдармен кездесіп, естеліктерін жазып алады. Сөйтіп, бірте-бірте мұражайдың қоры толыға түседі.
Бүгінгі музей ғимаратының өзі – өткен тарихтың көзі. Бұл екі үйді 1846 жылы Самарадан келген ресейлік көпес Казанцев салған. Кеңес өкіметі құрылған 20-ыншы жылдары Сәкен Сейфуллин Ақмолада уездік атқару комитетінде қызмет атқарады. Сол кезде әкімшіліктің кабинеттері осында орналасқан. Сондықтан бұл ғимаратта асыл азаматтың табанының ізі қалған.
1994 жылы Ақмолада ақынның жүз жылдық торқалы тойы өтеді. Мұражай жанынан ақынның үлкен еңселі ескерткіші бой көтерді. Бұл бейне – бүгінгі таңда елордаға ерекше көрік, рух беріп тұрған көркем ескерткіш. 1995 жылы тамыз айында Елбасымыз Нұрсұлтан Назарбаев Ақмолаға келгенде ақын музейіне бас сұғып, «Асыл бабамыз Сәкен Сейфуллин аруағы тәуелсіз елімізді желеп-жебеп жүрсін» деген қолтаңбасын қалдырады.
Қазір мұражай қорында алып азаматқа қатысты құнды жәдігерлер мен қызықты деректер көп. Мәселен, солардың арасынан Л. Мирзоян сыйлаған жазу машинкасы мен Сәкеннің үйленер алдында өзі сатып алған кереуетін айтуға болады. Бұл кереует туралы жары Гүлбаһрамға жазған хаты да сақтаулы. 1930 жылдары киген костюмі, өзбек достары сыйлаған тақиясы мен шапаны, тағы басқа да осындай қайраткердің жеке нәрселері мен бұйымдары бар. Оларға келушілер қызығып қарайды. Сондай-ақ, есіл ердің хаттары мен түрлі құжаттары, мақалалары, фотосуреттері, жарық көрген кітаптары да сақталған.
Ақын мұражайын Роза апамыздан кейін белгілі ақын Серік Тұрғынбек, әнші, өнер зерттеушісі Серік Оспанов басқарды.
Қазір қасиетті шаңыраққа көрнекті ақын, Мемлекеттік сыйлықтың лауреаты Несіпбек Айтұлы бас-көз болып отыр. Мұражайдың екі ғимаратына толық жаңғырту жұмыстары жүргізілді. Жан-жағы қоршалды.
Биыл ақпан айында музейге Сәкеннің фарфордан жасалған мүсіні қойылды. Сонымен қатар, мұражай басшылығы үш жылдан бері дарынды қаламгер шығармашылығын зерттеуге арнаған «Сыр сандық» сериясымен кітаптар шығарды.
