Сол күні журналистер мерекелік концерттен бұрын жиналған болатын. Есіктен еніп, ентігімізді басқан кезде алакөлеңке болып тұрған вестибюльдің басты шамы жанғанда, айнала самаладай жарқырап сала берді.
«Астана Операның» салтанатты төрінде үлкен қарбалас. Әлемнің аты озған опера театрлары өз қойылымдарындағы басты партияны орындауға аттай қалап алатын белгілі сопрано, классикалық музыка әлемінің танымал әншісі Анна Нетребко концерт алдында репетиция жасап жатыр. Апырай, әлемдік сыншыларды қайран қалдырып, даусының саф тазалығына, күш-қуаты мен ерекше әуезіне қоса, сахнадағы кербездігіне қарап, «ән айтатын Одри Хёпберн» атанған әнші қайда деп төңірекке көз салдық. Тізесінен келетін кең көйлек киген, бұрымын желкесіне буып қойған Анна оркестрдің сазына құлақ түріп, арасында «мені де тыңда» дегендей көмейден шыққан күміс әнін төгіп жіберіп, алысқа шабатын жүйріктей атқақтап тұрғандай әсер қалдырды. Кеудеде толқыған сезімді шығарғысы келгендей әнші екі қолын әсем тербеп, бүкіл жан-тәнімен ән салып тұрғандай. Құлағымыздан еніп, бойымызды шымырлатқан әуен алысқа жетелейді, көзіміз – Аннада. Осыншама құдірет талдырмаш жанның бойында қалай жиналған? Әншіге қос қанат біткендей сахна төрінде қалықтап, қайта қонғандай. Кенет әдемі әуен кілт үзіліп, Анна даярлығын аяқтап, асығыс басып сахна сыртына бет алды. Тәтті елестен айырылып қалған біздерге бұрылып бір қарады. Ізінен еріксіз ердік.
Анна көп күттірген жоқ. Зерлі көйлегін киіп, шашын әдемілеп түйіп журналистермен кездесуге қайта шықты. Концерт басталуына аз ғана уақыт қалды. Осындайда көп сауал қоя саласың ба?! Дегенмен, Аннаның Астанаға алғашқы сапарынан алған әсерін біліп алдық. Керемет! Ал «Астана Опера» ғимаратының салтанаты, үздік акустикасы әншіні таң қалдырыпты. Жайдары мінезді астаналықтарға, театрдың құрақ ұшқан қызметкерлеріне алғысы ерекше екен. Аннадан Пласидо Доминго, Дмитрий Хворостовскиймен бірге және жеке берген концерттері жайлы, өзі тұрақты қонағы болып табылатын Зальцбург өнер фестивалі туралы, немістің «Дойче граммофон» студиясында жазған соңғы альбомы мен әлемнің бірнеше еліндегі хит-парадтардың шыңына шығарған классикалық музыка альбомдары туралы білгіміз келді…
Сонымен, соңғы қоңырау соғылып, Астана күні құрметіне арналған әлем жұлдыздарының гала-концерті басталып та кетті.
Бұл күн жұлдыздар жауған күн болды. Концерттің алғашқы бөлімде Анна Нетребко мен тенор Ахмед Агади кезекпе-кезек өнер көрсетіп, белгілі опералардан ария орындады. Келесі бөлімде Франция әдебиеті мен өнері орденінің иегері Вадим Репин ХҮІІІ-ХХІ ғасырларда скрипкаға арналып жазылған шығармаларды орындады. Айта кететіні, мықтылардың ең мықтысына көрсетілетін құрмет Вадим Репинге көрсетілген екен. Ол 1736 жылы жасалған Гварнери дель Джезудің «Lafont» скрипкасында ойнау құрметіне ие болған.
