Елорда әкімдігінде құрылыс саласындағы сыбайлас жемқорлықтың алдын алу мәселесіне қатысты «дөңгелек үстел» өтті. Астана қаласы бойынша Мемлекеттік сәулет-құрылыс бақылау және лицензиялау департаментінің ұйымдастыруымен өткен шараға қаланың бірқатар басқармалары мен құрылыс және жобалау компанияларының өкілдері қатысты.
Астана қаласы бойынша мемлекеттік сәулет-құрылыс бақылау және лицензиялау департаментінің директоры Қайрат Бисембаев құрылыс саласындағы сыбайлас жемқорлыққа жол бермес үшін мемлекеттік қызметкерлер арасында түсіндіру жұмыстарын жетілдіру қажеттігіне назар аударды. Мәселен, жыл басынан бері елордалық қаржы полицейлері 64 жемқорлық қылмысты анықтаған. Заңбұзушылыққа жол берген Астана қаласы бойынша Төтенше жағдайлар департаментінің 75 қызметкері және Қылмыстық атқару жүйесі департаментінің екі маманы жұмыстан шығарылған. Экономикалық және сыбайлас жемқорлыққа қарсы күрес департаментінің өкілі Науан Жүнісовтің айтуынша, жыл басынан бері ішкі істер органдарының бірнеше қызметкері қылмыстық жауапқа тартылған. «Оның ішінде түрлі құрылымдардың жетекшілері кездеседі. Мәселен, Астана қаласы бойынша Қылмыстық атқару жүйесі департаменті басшысының орынбасары Мейрамбеков, Шортанды қаласы Ішкі істер бөлімі басшысының орынбасары Бигахметов, Көліктегі ішкі істер департаменті тыл басшысының орынбасары Оспанов және Алматы және Сарыарқа аудандық Ішкі істер органдарының қызметкерлері де бар» – дейді ол.
Жиында Мемлекеттік қызмет істері агенттігінің Астана қаласы бойынша департаментінің басшысы Тілеген Қаскин Тәртіптік кеңес отырыстарында қаралған мәселелерді атап өтті. Елбасының сыбайлас жемқорлықпен ымырасыз күрес мәселесі жайлы тапсырмаларын орындауда аумақтық және жергілікті атқарушы мемлекеттік органдардың жұмысына кеңінен тоқталды.
Соңғы алты айдың ішінде Тәртіптік кеңес өткізген төрт отырыста барлығы 15 іс қаралған екен. Кеңес отырысының қорытындысы бойынша тоғыз лауазымды тұлға жауапкершілікке тартылған. Оның ішінде 5 қызметкерге қатаң сөгіс берілген. Бір адам қызметіне толық сәйкес еместігі туралы ескерту алса, үш қызметкер атқаратын лауазымынан босатылған көрінеді.
Жиын соңында құрылыс компанияларының өкілдері де өз ойларымен бөлісті. Сыбайлас жемқорлық болған жерде сапалы құрылыс жүргізілмейтінін алға тартқан олар бұл мәселеге билік тарапынан қадағалау жұмыстарын барынша күшейту керектігін айтты.
Гүлмира АЙМАҒАНБЕТ
