Астаналық тоғыз жасар шахматшы – Бибісара Асаубаева Әлем біріншілігінде төртінші мәрте алтын алқалады.
Биылғы чемпионат грек шығанағындағы Халкидиде өтті. «Қатысқан 52 қазақстандықтың арасында тек Бибісара ғана тоғыз мүмкіндіктен 8,5 балл жинап, топ жарды. 2011 жылдан бері жас шахматшы Польшада, Бразилияда және Румынияда өткен әлем чемпионатында үш рет үздік шыққанын да айта кеткен жөн.
Бибісара Асаубаева 2010 жылдан бері Астана қаласындағы Х.С.Омаров атындағы шахмат клубында тәлім алып келеді. Жеке жаттықтырушысы Азамат Әубәкіров жас қыздың талантына сүйсініп, мақтан ететінін жасырмады: «Бибісараның бұл алғашқы үздік шығуы емес, ол мұндай бас жүлдені бұдан бұрын да үш рет жеңіп алған. Жеңіске деген құштарлығы зор, өте еңбексүйгіш. Жалықпай-талмай жаттығуының арқасында осындай биік мәртебеге ие болып жүр».
Бибісараның алтынына қоса, сайысқа қатысқан қазақстандық жас шахматшылар медальдер мен марапаттарға ие болды. Атап айтсақ, өзінің әлем чемпионатындағы дебюттік өнер көрсетуінде Әмина Қайырбекова жеті жасқа дейінгі санатта күміс медаль алса, 15 жасар Жанат Сайын қолаға қол жеткізді».
Ербол ЖАНАТ
