Астанада кәмелетке толмағандар арасында құқық бұзушылықтың алдын алу мақсатында «Түнгі қаладағы балалар» шарасы өтті. Нәтижесінде 32 әкімшілік құқық бұзушылық анықталды.
Балалар мен жасөспірімдердің түнгі уақытта ойын-сауық орындарында жүруіне жол бермеу, олардың қатысуымен болатын қылмыстың алдын алуды көздеген шара барысында ювенальді полиция 35 ойын-сауық орыны, 10 дәмхана, 23 компьютерлік клуб пен интернет-кафені шолып шықты. Тексеру барысында балалардың түнгі уақытта ойын-сауық орындарына кіруіне мүмкіндік бергені үшін 32 адам әкімшілік жауапкершілікке тартылды. Түрлі құқықбұзушылық бойынша 27 жасөспірім аудандық ішкі істер басқармасына жеткізілген. Кәмелетке толмаған 8 бала тіркеуге алынса, олардың төртеуі жағдайы төмен отбасының балалары екені анықталды.
Жалпы, жыл басынан бері балаларын түнгі уақытта қараусыз қалдырған немесе ойын-сауық орындарына баруына жол берген 400 ата-ана жауапкершілікке тартылған.
